سیمیینیو کی شاندار کارکردگی تسلسل برقرار، مانچسٹر سٹی لیگ کپ فائنل کے قریب

لندن۔14جنوری (اے پی پی):مانچسٹر سٹی نے لیگ کپ کے سیمی فائنل کے پہلے مرحلے میں نیو کیسل کو اس کے ہوم گراؤنڈ پر 0-2 گول سے شکست دے کر فائنل کی جانب بڑا قدم بڑھا دیا۔ ڈھاکہ ٹریبیون کے مطابق سینٹ جیمز پارک، نیو کیسل اپون ٹائن میں کھیلے گئے سیمی فائنل کے پہلے مرحلے کے میچ میں مانچسٹر سٹی کے نئے سائن کیے گئے گھانا کے فارورڈ اینٹوئن سیمنیوایک بار پھر نمایاں رہے۔گزشتہ ہفتے بورن مائوتھ سے 65 ملین پاؤنڈ کے عوض مانچسٹر سٹی میں شامل ہونے والے سیمیینیو نے نیو کیسل یونائیٹڈ کے خلاف میچ کا پہلا گول 53 ویں منٹ پر سکور کیا، جبکہ ان کا ایک اور گول وی اے آر کے طویل جائزے کے بعد متنازع طور پر مسترد کر دیا گیا۔

میچ کے آخری لمحات میں ریان چرکی نے 98ویں منٹ میں گول کر کے اپنی ٹیم مانچسٹرسٹی کی برتری کو 0-2 گول سے مضبوط بنا دیا۔نیو کیسل یونائیٹڈکی ٹیم جس نے گزشتہ سیزن لیگ کپ جیت کر 70 سالہ طویل گھریلو ٹرافی کی پیاس بجھائی تھی، اب 4 فروری کو ہونے والے سیمی فائنل کے دوسرے مرحلے میں ویمبلے پہنچنے کے لیے غیر معمولی کم بیک کی محتاج ہوگی ۔مانچسٹر سٹی کے منیجر پیپ گارڈیولا نے مضبوط ٹیم میدان میں اتاری، جہاں ارلنگ ہالینڈ نے تین سال بعد لیگ کپ میں آغاز کیا، حالانکہ چند ہی دن بعد مانچسٹرسٹی کو پریمیئر لیگ میں مانچسٹر یونائیٹڈ کا سامنا ہے۔