فلسطینی علاقے کی تعمیر نو، سکیورٹی کے قیام اور بنیادی سہولیات کی بحالی پر توجہ دی جائے گی،غزہ انتظامی کمیٹی

غزہ ۔18جنوری (اے پی پی):غزہ کی قومی انتظامی کمیٹی نے اعلان کیا ہے کہ وہ فلسطینی علاقے کی تعمیر نو، سکیورٹی کے قیام اور بنیادی سہولیات کی بحالی پر توجہ دے گی جس میں بجلی، پانی، صحت کی سہولیات اور تعلیم شامل ہیں۔ العربیہ کے مطابق اتوار کو جاری بیان میں کہا گیا کہ امن کونسل کے مندوبین نے انسانی امداد کے دائرہ کار کو بڑھانے، عوامی خدمات کی بحالی، اہم بنیادی ڈھانچے کی مرمت اور عدلیہ و سکیورٹی اداروں کی تنظیم نو کے منصوبے تیار کرنا شروع کر دیئے ہیں۔کمیٹی نے اعلیٰ معیار کی شفافیت اور ایمانداری پر زور دیتے ہوئے ایک ایسی پیداواری معیشت قائم کرنے کا عہد کیا ہے جو روزگار کے مواقع پیدا کرے اور خود انحصاری کو فروغ دے، یہ سب فلسطینی حقوق اور حق خود ارادیت کے حصول کے ویژن کے تحت کیا جائے گا۔

یہ اعلان اس کے بعد سامنے آیا جب غزہ کی قومی انتظامیہ کمیٹی جو سلامتی کونسل کی قرارداد اور امریکی صدر ڈونلڈ ٹرمپ کے پیش کردہ بیس نکاتی امن منصوبہ کے تحت قائم کی گئی ہے، نے 15 جنوری 2026کو قاہرہ میں اپنا افتتاحی اجلاس منعقد کیا اور غزہ میں سول اور اندرونی سکیورٹی کے امور کی ذمہ داری سنبھالنے کے لیے باقاعدہ آغاز کا اعلان کیا۔افتتاحی اجلاس کے دوران کمیٹی کے جنرل کمشنر ڈاکٹر علی شعث نے مختصر بیان میں کہا کہ کمیٹی کی تشکیل غزہ کے راستے میں ایک اہم سنگ میل کی نمائندگی کرتی ہے اور اس نئی باڈی کی مکمل فلسطینی نوعیت پر زور دیا۔

انہوں نے کہاکہ قومی کمیٹی کی تشکیل ایک المیےسے نئے آغاز کی طرف تبدیلی کی علامت ہے، یہ ایک فلسطینی ادارہ ہے جو فلسطینیوں نے فلسطینیوں کے لیے قائم کیا ہے اور اسے فلسطینی قیادت، فلسطینی اتھارٹی اور فلسطینی دھڑوں کی حمایت حاصل ہے، غزہ کی تعمیر نو صرف بنیادی ڈھانچے تک محدود نہیں بلکہ ایک ایسا معاشرہ دوبارہ قائم کرنا ہے جو استحکام، وقار اور منصفانہ اور پائیدار امن پر مبنی ہو۔العربیہ اردو کے مطابق کمیٹی میں فلسطینی پیشہ ور افراد اور عبوری دور کے انتظام کے ماہرین شامل ہیں۔

ان میں عبد الکریم عاشور امور زراعت، عمر شمالی مواصلات و ڈیجیٹل خدمات، ڈاکٹر عاید ابو رمضان معیشت، صنعت اور تجارت، ڈاکٹر جبر الداعور تعلیم، ڈاکٹر بشیر ریس مالیات، ڈاکٹر عاید یاغی صحت، سامی نصمان داخلی امور، عدنان ابو وردہ، انصاف، اسامہ الصداوی زمین و رہائش، هنا ترزی سوشل سکیورٹی اور ڈاکٹر علی برہوم پانی، سہولیات اور مقامی اداروں کے امور کی نگرانی کریں گے۔ کمیٹی نے اعلان کیا کہ آئندہ ہفتوں میں مزید تقرریاں بھی کی جائیں گی۔کمیٹی نے اس عزم کا اظہار کیا کہ غزہ کے عوام کے لیے ایسے ادارے قائم کیے جائیں جو وقار، مساوات اور امید فراہم کریں۔