ملکی اقتصادی ترقی کے لیے چھوٹے اور درمیانے درجے کے کاروباروں کو بااختیار بنانا ناگزیر ہے، سردار طاہر محمود

اسلام آباد۔23جنوری (اے پی پی):اسلام آباد چیمبر آف کامرس اینڈ انڈسٹری (آئی سی سی آئی) کے صدر سردار طاہر محمود نے اس بات پر زور دیا ہے کہ پائیدار اقتصادی ترقی کا حصول براہ راست مائیکرو، سمال اینڈ میڈیم انٹرپرائزز (ایم ایس ایم ای) سے منسلک ہے جسے انہوں نے پاکستان کی معیشت میں ریڑھ کی ہڈی قرار دیا ہے۔

جمعہ کو یہاں صنعتی شعبے کے نمائندہ وفد سے بات چیت کرتے ہوئے آئی سی سی آئی کے صدر نے کہا کہ ایم ایس ایم ای روزگار پیدا کرنے، غربت میں کمی، برآمدی نمو اور اختراع میں اہم کردار ادا کرتے ہیں اور 6 سے 7 فیصد کی پائیدار جی ڈی پی کی شرح نمو حاصل کرنے کے لیے ناگزیر ہیں جو کہ صرف لوکلائزیشن اور ایکسپورٹ پر مبنی صنعت سے ہی ممکن ہے۔

انہوں نے زور دے کر کہا کہ ایم ایس ایم ایز کو بااختیار بنائے بغیر طویل المدتی معاشی استحکام اور جامع ترقی ناقابل حصول رہے گی۔سردار طاہر محمود نے کہا کہ ایم ایس ایم ایز صنعتی پیداوار میں نمایاں حصہ ڈالتے ہیں اور ملک بھر میں لاکھوں لوگوں بالخصوص نوجوانوں اور خواتین کو ذریعہ معاش فراہم کرتے ہیں۔ انہوں نے کہا کہ ٹارگٹڈ پالیسی سپورٹ، مالیات تک آسان رسائی، ٹیکنالوجی کی اپ گریڈیشن اور ہنر کی ترقی اس شعبے کی مکمل صلاحیتوں کو کھولنے کے لیے اہم ہیں۔

آئی سی سی آئی کے صدر نے حکومت پر زور دیا کہ وہ ایم ایس ایم ایز کے لیے ٹیکس کے نظام کو آسان بنا کر کاروبار کرنے کی لاگت کو کم کر کےسستی توانائی کو یقینی بنا کر اور قرض تک رسائی میں آسانی فراہم کر کے ایم ایس ایم ایز کے لیے سازگار کاروباری ماحول پیدا کرے۔ انہوں نے کہا کہ چیمبر وکالت، تربیتی پروگراموں اور اکیڈمی اور صنعت کے درمیان مضبوط روابط کے ذریعے انٹرپرینیورشپ، سٹارٹ اپس اور چھوٹے کاروباروں کی استعداد کار بڑھانے کے لیے سرگرم عمل ہے۔

انہوں نے مزید کہا کہ اسلام آباد چیمبر آف کامرس ایم ایس ایم ایز کی حمایت کے لیے پرعزم ہے تاکہ وہ مسابقتی، لچکدار اور ترقی پر مبنی کاروباری اداروں میں تبدیل ہو سکیں۔سردار طاہر محمود نے مزید کہا کہ مربوط اختراعات، برآمدات کو بڑھانے اور متوازن علاقائی ترقی کو یقینی بنانے کے لیے ایک متحرک ایم ایس ایم ای سیکٹر ضروری ہے۔