مایہ ناز گھڑسوار عثمان خان ایشین گیمز میں تمغہ جیتنے کے لئے پر عزم

اسلام آباد۔25جنوری (اے پی پی):پاکستان کے مایہ ناز گھڑسوار عثمان خان ستمبر 2026 میں ہونے والے ایشین گیمز میں تمغہ جیتنے کے لیے پُرعزم ہیں اور ایک بار پھر اپنے ملک کا نام روشن کرنے کا عزم رکھتے ہیں۔اے پی پی سے گفتگو کرتے ہوئے عثمان خان نے اس میگا ایونٹ میں تمغہ حاصل کرنے کے اعتماد کا اظہار کیا، جو ایشین گیمز کے لیے پاکستان کی چوتھی کوالیفیکیشن ہوگی۔

انٹرنیشنل ایکوسٹرین فیڈریشن 2025 کی ورلڈ رینکنگ کے مطابق عثمان خان مڈل ایسٹ اور افریقہ ایونٹنگ زون میں نمبر ون رینک پر فائز ہیں۔ ماضی میں انہیں کچھ رکاوٹوں کا سامنا رہا، جن میں کووِڈ-19 وبا کے باعث ٹوکیو 2020 اولمپکس میں شرکت نہ کر پانا اور دیگر وجوہات کی بنا پر پیرس 2024 سمر اولمپکس سے محرومی شامل ہے۔ ان چیلنجز کے باوجود وہ ایشین گیمز میں پاکستان کی کامیابی کے حوالے سے پُرامید ہیں۔فرانسیسی گھوڑے کے ساتھ اور ہفتے میں 5 سے 6 دن کی سخت تربیت جمناسٹک، شو جمپنگ اورگیلپ رن کے ذریعے عثمان خان ایشین گیمز کی تیاری کر رہے ہیں جبکہ پرتگال میں ہونے والے آئندہ مقابلے وارم اپ کے طور پر کام آئیں گے۔

انہوں نے 20 سالہ تجربے کو بروئے کار لاتے ہوئے 250 سے زائد بین الاقوامی مقابلوں میں حصہ لیا ہے۔عثمان خان نے ایشین گیمز میں شرکت کے لیے تقریباً ایک لاکھ 50 ہزار یورو کے لاجسٹکس بجٹ کی ضرورت پر زور دیا اور جاپان تک گھوڑوں کی منتقلی کو ایک بڑا چیلنج قرار دیا۔انہوں نے کہا کہ اللہ ہمیں ایشین گیمز میں شرکت کا موقع دیتا ہے تو ہم ان شاءاللہ ملک کے لیے تمغے جیتیں گے۔

انہوں نے کہا کہ میں پہلے سے تمغوں کی بات نہیں کرنا چاہتا کیونکہ میرا ماننا ہے کہ آپ کا کام خود بولتا ہے۔عثمان خان کا مقصد پاکستان کے نوجوان گھڑ سواروں کو متاثر کرنا ہے۔ انہوں نے کامیابی کے حصول کے لیے محنت اور ایمان کی اہمیت پر زور دیتے ہوئے امید ظاہر کی کہ وہ 2019 کی تاریخی کارکردگی کو بنیاد بنا کر پاکستان کو اولمپکس تک لے جائیں گے۔

انہوں نے کہا کہ میرا مقصد ہمیشہ پاکستان کو بین الاقوامی سطح اور اولمپکس تک لے جانا رہا ہے،نوجوانوں کے لیے میرا پیغام ہے کہ جب بھی کچھ کرنا چاہیں تو اپنی پوری کوشش کریں اور اللہ سے دعا کریں وہ ضرور اجر دے گا۔