مشعال حسین ملک کاآزاد جموں و کشمیر کے سابق وزیراعظم اور صدر بیرسٹر سلطان محمود چوہدری کے انتقال پر گہرے رنج و غم کا اظہار

اسلام آباد۔31جنوری (اے پی پی):حریت رہنما یاسین ملک کی اہلیہ مشعال حسین ملک نے آزاد جموں و کشمیر کے سابق وزیراعظم اور صدر بیرسٹر سلطان محمود چوہدری کے انتقال پر گہرے رنج و غم کا اظہار کرتے ہوئے کہا کہ کشمیر کی آزادی کی تحریک ایک نڈر، اصول پسند اور عالمی سطح پر مؤثر آواز سے محروم ہو گئی ہے جو کشمیری عوام کے حقِ خودارادیت کو مسلسل بین الاقوامی فورمز پر اجاگر کرتے رہے۔

ہفتہ کو اپنے بیان میں انہوں نے کہا کہ بیرسٹرسلطان محمود چوہدری جو اپنے سیاسی کیریئر کے دوران ثابت قدم رہےنے مسئلہ کشمیر کو عالمی سطح پر اجاگر کرنے میں کلیدی کردار ادا کیااور ان کی سیاسی بصیرت،موقف کی وضاحت اور کشمیر کے لیے تاحیات خدمات آزادی کی جدوجہد کے لیے مشعلِ راہ بنی رہیں گی۔

مشعال حسین ملک نے کہا کہ مرحوم رہنما مسئلہ کشمیر کے ایک سچے اور غیرسمجھوتہ کرنے والے داعی تھے جن کی آواز عالمی پلیٹ فارمز پر بھرپور وزن رکھتی تھی۔انہوں نے کہا کہ حقِ خودارادیت کے حوالے سے ان کا مضبوط اور دوٹوک مؤقف کشمیری عوام کی امنگوں سے ان کی گہری وابستگی کا مظہر تھا۔مشعال حسین ملک نے کہا کہ بیرسٹر سلطان محمود چوہدری کی تحریکِ کشمیر کے لیے خدمات تاریخی اور دیرپا نوعیت کی ہیں، اور ان کے انتقال سے پیدا ہونے والا خلا آسانی سے پُر نہیں کیا جا سکے گا۔

انہوں نے کہا کہ مرحوم کی جرأت، تسلسل اور عالمی سطح پر حمایت آئندہ نسلوں کے لیے ایک معیار قائم کرتی ہےجس سے یہ یقینی بنتا ہے کہ کشمیر کی جاری جدوجہد میں ان کی میراث ہمیشہ زندہ رہے گی۔