وفاقی وزیر برائے سائنس و ٹیکنالوجی سے یو نیسکو کے ڈائریکٹر جنرل کی ملاقات، سائنس اور ٹیکنالوجی کو مزید فروغ دینے پر تبادلہ خیال

اسلام آباد۔3فروری (اے پی پی):وفاقی وزیر برائے سائنس و ٹیکنالوجی خالد حسین مگسی نے منگل کو وزارتِ سائنس و ٹیکنالوجی کے دورے پر آئے ہوئے ڈاکٹر خالد الانانی کا استقبال کیا۔ وفاقی وزیر نے اس بات پر زور دیا کہ یہ دورہ اس وقت ہوا ہے جب سائنس، پالیسی اور بین الاقوامی تعاون عالمی استحکام اور پائیدار ترقی کے لئے انتہائی اہمیت رکھتا ہے۔وفاقی وزیر خالد مگسی نے اس موقع پر پاکستان کے یو نیسکو کے ساتھ طویل المدتی سٹریٹجک شراکت داری کو اجاگر کیا۔

انہوں نے کہا کہ پاکستان اپنے تعلقات کو یو نیسکو کے ساتھ صرف رسمی تعلقات کے طور پر نہیں دیکھتا، یہ ایک سٹریٹجک تعاون ہے جس نے ملک میں سائنس اور ٹیکنالوجی کو نمایاں طور پر فروغ دیا ہے۔مشترکہ منصوبوں کے ذریعے پاکستان نے اپنی داخلی صلاحیتوں کو مضبوط کیا اور عالمی سائنسی کمیونٹی میں فعال حصہ ڈالا۔وفاقی وزیر نے وزارت سائنس و ٹیکنالوجی کے کردار پر بھی زور دیا کہ یہ محققین اور پالیسی سازوں کو بااختیار بنانے، علم کے تبادلے کو فروغ دینے اور سائنسی ترقی کو آگے بڑھانے میں اہم کردار ادا کر رہا ہے۔

پاکستان سائنس فاؤنڈیشن اور نیشنل انسٹی ٹیوٹ آف اوشینوگرافی جیسی ادارے یو نیسکو کے مشن کے مطابق سائنس کو معاشرتی فلاح کے لئے استعمال کرنے میں اپنا کردار ادا کر رہے ہیں۔ انہوں نے مزید کہا کہ تقریباً دو دہائیوں سے پاکستان نے کامیابی کے ساتھ ورلڈ سائنس ڈے اور مختلف قومی سائنسی میلے منعقد کئے ہیں جس سے نوجوانوں کو تحریک ملی اور سائنس کو امن اور ترقی کے لئے ایک طاقتور ذریعہ کے طور پر فروغ ملا۔وفاقی وزیر نے پاکستان کے یو نیسکو کے ساتھ نتیجہ خیز تعاون کے وژن کا بھی ذکر کیا۔

انہوں نے کہا کہ ہماری توجہ ماحولیاتی لچک، نیلے معیشت کے تحت سمندری تحقیق کو فروغ دینے اور غیر رسمی تعلیم کو بڑھانے پر مرکوز ہے، ہم سائنس کو عملی حل میں بدلنے کے لئے پرعزم ہیں۔وفاقی وزیر نے اختتام پر پاکستان کی خواہش کا اظہار کیا کہ یو نیسکو کے ساتھ تعاون کو مزید گہرا کریں، نئی اختراعی راہیں تلاش کریں اور پائیدار ترقی کو یقینی بنائیں۔ انہوں نے کہا کہ ہم آپ کے تعاون کے منتظر ہیں تاکہ سائنس و ٹیکنالوجی میں عملی اور مؤثر نتائج حاصل کر سکیں۔