بابر اعظم اپنی تکنیک، انداز اور مستقل مزاجی کی وجہ سے شائقین کرکٹ کے دلوں میں خاص مقام رکھتے ہیں، یاسر حمید

کولمبو۔12فروری (اے پی پی):سابق پاکستانی کرکٹر یاسر حمید نے سٹار بلے باز بابر اعظم کو پاکستان کے لیے ایک قیمتی اثاثہ قرار دیتے ہوئے کہا ہے کہ جب وہ کھیلتے ہیں تو انہیں دیکھنا ہمیشہ ایک خوشگوار تجربہ ہوتا ہے۔ ان کے مطابق بابر اعظم اپنی تکنیک، انداز اور مستقل مزاجی کی وجہ سے شائقین کرکٹ کے دلوں میں خاص مقام رکھتے ہیں۔بابر اعظم کو ملک کے مقبول ترین اور باصلاحیت بلے بازوں میں شمار کیا جاتا ہے اور جب بھی وہ میدان میں اترتے ہیں تو مداح ان سے بڑی اننگز کی امید رکھتے ہیں۔

کچھ عرصے تک فارم میں اتار چڑھائو کے بعد 31 سالہ بلے باز نے دوبارہ ردھم حاصل کرنے کے آثار دکھائے ہیں۔ نومبر 2025ء میں سری لنکا کے خلاف ون ڈے سیریز میں ان کی ناقابل شکست 102 رنز کی اننگز دو سال سے زائد عرصے کے بعد ان کی پہلی انٹرنیشنل سنچری تھی۔حالیہ آسٹریلیا کے خلاف تین ٹی ٹوئنٹی میچوں کی سیریز میں بابر اعظم نے 76 رنز سکور کیے جس میں ایک ناقابل شکست 50 رنز کی اننگز شامل تھی۔ اس سیریز میں ان کی اوسط 38 جبکہ سٹرائیک ریٹ 124.59 رہا۔

یاسر حمید نے میڈیا سے گفتگو کرتے ہوئے کہا کہ جب بابر اعظم کھیلتے ہیں تو انہیں دیکھنا ہمیشہ ایک ٹریٹ ہوتا ہے اور وہ پاکستان کے لیے ایک اہم اثاثہ ہیں۔بابر اعظم اس وقت 2026ء کے ٹی ٹوئنٹی ورلڈ کپ میں پاکستان کی نمائندگی کر رہے ہیں۔ انہوں نے ایونٹ کا آغاز نیدرلینڈز کے خلاف 15 اور امریکا کے خلاف 46 رنز کی اننگز سے کیا۔ پاکستان اپنا اگلا میچ 15 فروری کو کولمبو میں روایتی حریف بھارت کے خلاف کھیلے گا۔