ایف آئی ایچ ہاکی پرولیگ ، مردوں کے مقابلے میں ارجنٹائن نے بھارت کو یکطرفہ مقابلے کے بعد 0-8 سے شکست دیدی

کولمبو ۔12فروری (اے پی پی):سوئٹزرلینڈ میں جاری ایف آئی ایچ ہاکی پرو لیگ میں جمعرات کو کھیلے گئے میچوں میں ارجنٹائن اور آسٹریلیا کی ٹیموں نے شاندار کامیابیاں سمیٹ لیں، جبکہ آسٹریلوی خواتین نے سنسنی خیز مقابلے کے بعد آئرلینڈ کو شوٹ آؤٹ میں شکست دے کر اضافی پوائنٹ حاصل کیا۔ مردوں کے مقابلے میں ارجنٹائن نے میزبان بھارت کو راؤرکیلا میں یکطرفہ مقابلے کے بعد 0-8 سے شکست دے دی۔ ٹوماس دومینے نے چار گول داغ کر اپنی ٹیم کی بڑی فتح میں کلیدی کردار ادا کیا۔ میچ کے آغاز میں دونوں جانب سے حملے دیکھنے میں آئے تاہم پہلے کوارٹر کے اختتام سے قبل بھارت کو پنالٹی اسٹروک ملا جسے ہرمَن پریت سنگھ گول میں تبدیل نہ کر سکے، ان کی پہلی کوشش گول کیپر ٹوماس سانتیاگو نے روک لی جبکہ ریویو کے بعد ملنے والا دوسرا موقع بھی ضائع ہوگیا۔

اس کے فوراً بعد ارجنٹائن نے جوابی وار کرتے ہوئے ٹوماس روئز کے ذریعے برتری حاصل کرلی۔ دومینے نے جلد ہی پنالٹی کارنر پر گول کرکے اسکور 0-2 کردیا۔ دوسرے کوارٹر میں انہوں نے اپنا دوسرا گول اسکور کیا جبکہ بھارتی دفاعی غلطیوں کا فائدہ اٹھاتے ہوئے لوسیو مینڈیز اور اگناسیو ایبارا نے بھی گیند جال میں پہنچائی۔ دومینے نے 26ویں منٹ میں ہیٹ ٹرک مکمل کی، جبکہ نکولس ڈیلا ٹورے نے پنالٹی کارنر پر گول کرکے ہاف ٹائم تک اسکور 0-7 کردیا۔ دوسرے ہاف میں بھارت نے دفاع مضبوط کرنے کی کوشش کی تاہم آخری منٹ میں دومینے نے چوتھا گول کرکے مقابلہ 0-8 پر ختم کردیا۔ انہیں شاندار کارکردگی پر پلیئر آف دی میچ قرار دیا گیا۔

ان کا کہنا تھا کہ ٹیم نے گزشتہ میچ کی مایوسی کے بعد بھرپور ردعمل دیا اور سو فیصد کارکردگی دکھائی۔ ادھر ہوبارٹ میں کھیلے گئے مردوں کے ایک اور میچ میں آسٹریلیا نے عالمی چیمپئن جرمنی کو 0-3 سے زیر کرلیا۔ میزبان ٹیم نے آغاز ہی سے کھیل پر گرفت مضبوط رکھی اور پہلے کوارٹر کے اختتام سے قبل جوئل رنٹالا نے پنالٹی کارنر پر گول کرکے برتری دلائی۔ دوسرے کوارٹر میں کیمبل گیڈس نے ایک اور سیٹ پیس پر اسکور دگنا کردیا۔ تیسرے کوارٹر میں رنٹالا کی کوشش پر کریگ ماریس نے گیند جال میں پہنچا کر برتری 0-3 کردی۔ جرمنی کو میچ کے اختتام سے چند منٹ قبل پہلا پنالٹی کارنر ملا لیکن وہ بھی ضائع ہوگیا۔

آسٹریلیا کے لاچلن شارپ کو پلیئر آف دی میچ قرار دیا گیا، جن کا کہنا تھا کہ نوجوان ٹیم کے لیے یہ کامیابی نہایت اہم ہے اور مضبوط دفاع نے فتح میں بنیادی کردار ادا کیا۔ خواتین کے مقابلے میں آسٹریلیا اور آئرلینڈ کے درمیان میچ مقررہ وقت میں بغیر کسی گول کے برابر رہا۔ آئرلینڈ نے پہلے ہاف میں زیادہ مواقع پیدا کیے لیکن وہ انہیں گول میں تبدیل نہ کرسکی۔

تیسرے اور چوتھے کوارٹر میں آسٹریلوی گول کیپر زوئی نیومین نے عمدہ دفاع کرتے ہوئے حریف کے حملے ناکام بنائے۔ فیصلہ کن مرحلے میں میچ شوٹ آؤٹ تک جا پہنچا جہاں آسٹریلیا نے 2-4 سے کامیابی حاصل کرکے اضافی پوائنٹ اپنے نام کیا۔ ایمی لاٹن کو پلیئر آف دی میچ قرار دیا گیا، انہوں نے کہا کہ آئرلینڈ مضبوط ٹیم ہے اور پرو لیگ میں کسی بھی حریف کو آسان نہیں لیا جا سکتا۔