ایف آئی ایچ پرو لیگ: جرمنی اور بیلجیئم کی شاندار فتوحات، ارجنٹینا کی ناقابلِ شکست پیش قدمی جاری

کولمبو ۔14فروری (اے پی پی):ایف آئی ایچ ہاکی پرو لیگ میں ہفتہ کے روز جرمنی اور بیلجیئم کی مرد ٹیموں نے شاندار کارکردگی کا مظاہرہ کرتے ہوئے اپنے اپنے میچز جیت لئے جبکہ خواتین ٹیموں کے مقابلوں میں ارجنٹینا نے فتح اپنے نام کی۔ہوبارٹ میں جرمنی نے پاکستان کو 1-6 سے شکست دی جبکہ راؤرکیلا میں بیلجیئم نے میزبان بھارت کو 2-4 سے ہرایا۔ خواتین کے مقابلے میں ارجنٹینا نے آسٹریلیا کو 0-3 سے شکست دے کر اپنی ناقابلِ شکست مہم جاری رکھی۔جرمنی اور پاکستان کے میچ میں پہلا کوارٹر بغیر کسی گول کے ختم ہوا تاہم دوسرے کوارٹر میں پاکستان نے 18ویں منٹ میں وحید اشرف رانا کے ذریعے برتری حاصل کی۔

جرمنی نے اس کے بعد کھیل کا رخ موڑ دیا اور پہلے ہاف کے اختتام سے قبل فلورین اسپرلنگ، جسٹس وارویگ اور مورٹز لڈوگ کے گولز کی بدولت 1-3 کی برتری حاصل کر لی۔ دوسرے ہاف میں جرمنی نے مزید تین گول اسکور کیے جن میں ہنرک میرٹگنز، وارویگ کا دوسرا گول اور رافائل ہارٹ کوف کا فیلڈ گول شامل تھا۔ جسٹس وارویگ کو میچ کا بہترین کھلاڑی قرار دیا گیا۔خواتین کے مقابلے میں ارجنٹینا نے آسٹریلیا کو 0-3 سے ہرایا۔ پہلے ہاف میں زوئے ڈیاز نے شاندار انفرادی کوشش سے گول کر کے اپنی ٹیم کو برتری دلائی۔ تیسرے کوارٹر میں آسٹریلیا نے دباؤ بڑھایا لیکن ارجنٹینا کی گول کیپر کرسٹینا کوسینتینو نے عمدہ دفاع کیا۔

بعد ازاں یوجینیا ٹرِنچینیٹی اور اگسٹینا گورزیلانی نے مزید گول اسکور کر کے فتح یقینی بنائی۔ صوفیہ کیرو کو میچ کی بہترین کھلاڑی قرار دیا گیا۔بھارت اور بیلجیئم کے میچ میں بیلجیئم نے ابتدائی چھ منٹوں میں چار گول کر کے مقابلہ اپنے نام کیا۔ ہیوگو لابوشیئر اور الیگزینڈر ہینڈرکس نے ڈریگ فلکس پر گول اسکور کیے جبکہ آرتھر ڈی سلوور نے بھی ایک گول کیا۔ بھارت کی جانب سے آدتیہ ارجن لالاگے اور ہرمن پریت سنگھ نے گول کیے لیکن ٹیم خسارہ پورا نہ کر سکی۔ بیلجیئم کی برق رفتار کارکردگی فیصلہ کن ثابت ہوئی اور وہ 2-4 سے کامیاب رہے۔