چینی صدر شی جن پنگ کی کم جونگ اُن کو ورکرز پارٹی آف کوریا کے دوبارہ جنرل سیکرٹری منتخب ہونے پر مبارک باد

بیجنگ۔23فروری (اے پی پی):چین کے صدر شی جن پنگ نے کم جونگ اُن کو ورکرز پارٹی آف کوریا کے دوبارہ جنرل سیکرٹری منتخب ہونے پر مبارک باد دی ہے ۔ شنہوا کے مطابق چین کی کمیونسٹ پارٹی کی مرکزی کمیٹی کے جنرل سیکرٹری اور صدر شی جن پنگ نے پیر کو کم جونگ اُن کو ڈیموکریٹک پیپلز ریپبلک آف کوریا کی ورکرز پارٹی آف کوریا کے جنرل سیکرٹری کے طور پر دوبارہ منتخب ہونے پر مبارکباد دی ہے۔

تاس نے کورین سینٹرل نیوز ایجنسی (KCNA) کے حوالے سے بتایا کہ ورکرز پارٹی آف کوریا کی نویں کانگریس کے شرکا نے ووٹنگ کے ذریعے کم جونگ اُن کو ایک بار پھر پارٹی کا جنرل سیکرٹری منتخب کیا۔کے سی این اے نے اپنی رپورٹ میں کہا کہ پارٹی کے سربراہ کا انتخاب، جو ریاست اور عوام کو سوشلسٹ مقصد کی کامیابی کی جانب رہنمائی کی بھاری ذمہ داری سنبھالتا ہے، پارٹی کانگریس کے کام میں نہایت اہمیت رکھتا ہے۔ یہ فیصلہ پارٹی کی قیادت کی صلاحیت اور ملک و قوم کے مستقبل کے لیے انتہائی اہم معاملہ ہے۔

رپورٹ کے مطابق کانگریس نے کم جونگ اُن کو پارٹی کا اعلیٰ ترین رہنما دوبارہ منتخب کرنے کی تجویز کی مکمل حمایت اور منظوری دی۔ورکرز پارٹی آف کوریا کی نویں کانگریس 19 فروری کو پیانگ یانگ میں شروع ہوئی تھی، جس میں مجموعی طور پر 5 ہزار افراد شریک ہیں۔ ان میں پارٹی کی مرکزی قیادت کے 224 ارکان اور مقامی پارٹی دفاتر کی جانب سے بھیجے گئے 4 ہزار 776 مندوبین شامل ہیں۔