نیوزی لینڈ کے سابق قومی رگبی ٹیم کوچ سکاٹ رابرٹسن باربیریئنز کے کوچ مقرر

لندن۔25فروری (اے پی پی):نیوزی لینڈ کی قومی رگبی ٹیم کے سابق ہیڈ کوچ سکاٹ رابرٹسن آئندہ موسمِ گرما میں دوبارہ کوچنگ کی ذمہ داریاں سنبھالیں گے اور باربیریئنز کی قیادت کریں گے۔بی بی سی کے مطابق 51 سالہ سکاٹ رابرٹسن جون میں دو اہم بین الاقوامی مقابلوں میں ٹیم کے ساتھ ہوں گے۔ باربیریئنز پہلے عالمی چیمپئن جنوبی افریقہ کے خلاف 20 جون کو پورٹ الزبتھ میں میدان میں اتریں گے۔ اس کے بعد 27 جون کو لندن کے ٹوئکنہم سٹیڈیم میں ویلز کے خلاف میچ کھیلا جائے گا۔سکاٹ رابرٹسن کا کہنا ہے کہ باربیریئنز دنیا بھر کے کھلاڑیوں کو ایک پلیٹ فارم پر اکٹھا کرتی ہے اور اس تاریخی جرسی کی نمائندگی کرنا ان کے لیے اعزاز کی بات ہے۔

51 سالہ کوچ اس سے قبل نیوزی لینڈ کی قومی ٹیم آل بلیکس کے ساتھ 2 سال تک وابستہ رہے۔ انہوں نے 2017 سے 2023 کے درمیان اپنی سابقہ ٹیم کروسیڈرز کو مسلسل سات سپر رگبی ٹائٹل جتوائے، جو ایک ریکارڈ کامیابی سمجھی جاتی ہے۔نیوزی لینڈ رگبی یونین نے ان کے معاہدے میں ایک شق شامل کی ہے جس کے تحت وہ 2027 کے اوائل تک کسی بڑی ٹیسٹ ٹیم کی کوچنگ نہیں کر سکتے۔

تاہم اطلاعات کے مطابق اگر کوئی ملک 2026 میں آل بلیکس کے خلاف اپنے میچ مکمل کر لے تو سکاٹ رابرٹسن اس سے پہلے بھی ذمہ داری سنبھال سکتے ہیں۔سکاٹ رابرٹسن ماضی میں یہ خواہش ظاہر کر چکے ہیں کہ وہ رگبی ورلڈ کپ نیوزی لینڈ اور کسی دوسرے ملک کے ساتھ جیتنا چاہتے ہیں۔سکاٹ رابرٹسن اس سے قبل بھی چار بار باربیرینز کی قیادت کر چکے ہیں اور اس بار ارجنٹائن کے ہیڈ کوچ فیلیپ کونٹیپومی بھی ان کی معاونت کے لیے ٹیم سیٹ اپ کا حصہ ہوں گے۔