تیز رفتار و قابل اعتماد انٹرنیٹ ملکی معیشت، معاشرت، تعلیم، صحت اور قومی سلامتی کے لیے بنیادی اہمیت رکھتا ہے،وفاقی وزیر شزا فاطمہ خواجہ

اسلام آباد۔12مارچ (اے پی پی):وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ نے کہا ہے کہ تیز رفتار اور قابل اعتماد انٹرنیٹ ملکی معیشت، معاشرت، تعلیم، صحت اور قومی سلامتی کے لیے بنیادی اہمیت رکھتا ہے،فائیوجی کی نیلامی سے نہ صرف انٹرنیٹ سروس کی فراہمی بہتر ہوگی بلکہ یہ وزیراعظم محمد شہباز شریف کے ڈیجیٹل پاکستان وژن کو مضبوط بنیاد فراہم کرے گا۔ان خیالات کا اظہار انہوں نے فائیو جی سپیکٹرم کی اسائنمنٹ تقریب سے خطاب کے دوران کیا۔

انہوں نے کہا کہ پاکستان میں فائیوجی سپیکٹرم کی نیلامی کا پہلا مرحلہ کامیابی سے مکمل ہو گیا ہے جس کے تحت 480 میگا ہرٹز سپیکٹرم تین موبائل آپریٹرز جاز،زونگ اور یوفون نےحاصل کی، اس نیلامی کے ذریعے حکومت کو تقریباً 507 ملین ڈالر آمدن ہوئی۔ ان کا کہنا تھا کہ نیلامی کے پہلے مرحلے کے بعد ایک روزہ وقفے سے اسائنمنٹ مرحلے کا عمل ہوگیا جس میں مختلف بینڈز میں سپیکٹرم کی حتمی تقسیم کی گئی جبکہ 3.5 گیگا ہرٹز بینڈ کے عمل کا باقاعدہ افتتاح بھی کر دیا گیا ہے۔شزا فاطمہ خواجہ نے کہا کہ یہ نیلامی کئی حوالوں سے تاریخی ہے کیونکہ اس سے پہلے اتنی بڑی مقدار میں سپیکٹرم کبھی نیلام نہیں کیا گیا۔

انہوں نے بتایا کہ پاکستان 1987 سے اب تک مجموعی طور پر صرف 274 میگا ہرٹز سپیکٹرم پر کام کر رہا تھا جس کی وجہ سے ملک کو خطے میں سپیکٹرم کی کمی کا سامنا تھا، تاہم اس نیلامی کے بعد مجموعی سپیکٹرم تقریباً ساڑھے سات سو میگا ہرٹز تک پہنچ گیا جس سے پاکستان اب عالمی اوسط کے قریب آ گیا ہے۔وفاقی وزیر نے کہا کہ تیز رفتار اور قابل اعتماد انٹرنیٹ آج کی معیشت، معاشرت، تعلیم، صحت اور قومی سلامتی کے لیے بنیادی اہمیت رکھتا ہے، اس نیلامی سے نہ صرف فور جی سروس بہتر ہوگی بلکہ پاکستان باضابطہ طور پر فائیو جی دور میں بھی داخل ہو جائے گا جو وزیراعظم محمد شہباز شریف کے ڈیجیٹل پاکستان وژن کو مضبوط بنیاد فراہم کرے گا۔

انہوں نے کہا کہ جدید ٹیکنالوجی خصوصاً آرٹیفیشل انٹیلی جنس اور دیگر ابھرتی ٹیکنالوجیز کے لیے تیز رفتار انٹرنیٹ ناگزیر ہے، اس سے نوجوانوں کو تعلیم اور روزگار کے نئے مواقع ملیں گے جبکہ زراعت، صحت اور دیگر شعبوں میں بھی ٹیکنالوجی کے استعمال کو فروغ ملے گا بالخصوص دور دراز علاقوں میں تعلیم اور صحت کی سہولیات تک رسائی بہتر ہوگی۔ چیئرمین پاکستان ٹیلی کمیونیکیشن اتھارٹی میجر جنرل (ر) حفیظ الرحمٰن نے کہا کہ سپیکٹرم اسائنمنٹ کا عمل شفافیت کو یقینی بنانے کے لیے مکمل طور پر سافٹ ویئر کے ذریعے کیا گیا ۔

انہوں نے کہا کہ فریکوئنسی ایلوکیشن بورڈ اور ٹیلی کام انڈسٹری کے ساتھ مل کر سپیکٹرم کی دستیابی اور تکنیکی جانچ پڑتال پہلے ہی مکمل کی جا چکی ہے۔انہوں نے بتایا کہ اسائنمنٹ مرحلے میں مختلف آپریٹرز کو یہ اختیار دیا جا رہا ہے کہ وہ متعلقہ بینڈ میں اپنی فریکوئنسی کی حتمی پوزیشن (اوپر، درمیان یا نیچے) منتخب کریں۔