عیدالفطر سے قبل اسلام آباد میں سکیورٹی ہائی الرٹ، پولیس کا فلیگ مارچ

اسلام آباد۔20مارچ (اے پی پی):اسلام آباد کیپیٹل ٹیریٹری پولیس کی ڈولفن فورس نے چاند رات اور عیدالفطر سے قبل سکیورٹی کو یقینی بنانے کے لیے وفاقی دارالحکومت کے مختلف علاقوں میں رات گئے فلیگ مارچ کیا۔پولیس حکام کے مطابق فلیگ مارچ سینئر سپرنٹنڈنٹ آف پولیس (آپریشنز) قاضی علی رضا کی سربراہی میں کیا گیا، جس کا مقصد شہریوں میں تحفظ کا احساس پیدا کرنا اور پولیس کی تیاری کا عملی مظاہرہ کرنا تھا۔قاضی علی رضا نے کہا کہ اسلام آباد پولیس شہریوں کے جان و مال کے تحفظ کے لیے مکمل طور پر متحرک ہے اور عیدالفطر کے موقع پر دارالحکومت بھر میں مؤثر سکیورٹی انتظامات کیے گئے ہیں۔حکام کے مطابق فلیگ مارچ پاکستان اسپورٹس کمپلیکس سے شروع ہوا اور شہر کے مختلف علاقوں سے ہوتا ہوا دوبارہ اسی مقام پر اختتام پذیر ہوا۔پولیس نے اس عزم کا اعادہ کیا کہ امن و امان کا قیام اور عوام کے تحفظ کو یقینی بنانا اس کی اولین ترجیح ہے۔