جاپان میں حکومت مخالف احتجاجی ریلی میں ہزاروں شہریوں کی شرکت

ٹوکیو۔20اپریل (اے پی پی):جاپان میں شہریوں نے جاپانی پارلیمنٹ کے قریب احتجاجی ریلی نکالی ۔سی جی ٹی این کے مطابق اس ریلی میں سانائے تاکائیچی حکومت کی جانب سے ہتھیاروں کی برآمدات پر پابندی ہٹانے اور امن پسند آئین میں ترامیم کرنے جیسے اقدامات کی مخالفت کی گئی۔ یاد رہے کہ جاپانی پارلیمنٹ نے 7 اپریل کو 2026 کے مالی سال کے لیے بجٹ کی منظوری دی تھی جس کے تحت جاپان کا دفاعی بجٹ 9 ٹریلین ین سے تجاوز کر گیا۔

جاپانی حکومت مستقبل قریب میں "دفاعی سازوسامان کی منتقلی کے تین اصولوں” اور اس کے اطلاق کے حوالے سے رہنما خطوط میں ترمیم کرنے کا بھی ارادہ رکھتی ہے تاکہ جاپان کے ہتھیاروں کی بیرون ملک برآمد پر پابندیوں میں نرمی کی جا سکے۔ مظاہرین کا خیال ہے کہ یہ اقدامات جاپانی آئین کی امن پسندی پر مبنی روح کی خلاف ورزی ہیں اور علاقائی کشیدگی میں اضافے کا باعث بن سکتے ہیں۔

حالیہ عرصے میں جاپان میں عوام کی جانب سے متعدد بار ایسی احتجاجی ریلیاں منعقد کی گئی ہیں جن میں ہتھیاروں کی برآمدات پر پابندی ہٹانے اور آئین میں ترمیم کی کوششوں کی مخالفت کی گئی ہے۔