پاکستان اکیڈمی آف لیٹرز میں "تفسیر مطالب القرآن” کی تقریبِ رونمائی

اسلام آباد۔8جون (اے پی پی):پاکستان اکیڈمی آف لیٹرز میں معروف محقق اور عالمِ دین ڈاکٹر حبیب اللہ چشتی کی تصنیف "تفسیر مطالب القرآن” کی تقریبِ رونمائی منعقد ہوئی۔ تقریب میں مختلف مکاتبِ فکر سے تعلق رکھنے والے علما، اساتذہ، طلبہ اور ممتاز شخصیات کی بڑی تعداد نے شرکت کی۔ ڈاکٹر حبیب اللہ چشتی جو اسلام آباد ماڈل پوسٹ گریجویٹ کالج ایچ-8 میں بطور ایسوسی ایٹ پروفیسر خدمات انجام دے رہے ہیں، اسلامی موضوعات پر ساٹھ سے زائد کتابوں کے مصنف ہیں۔ تقریب سے خطاب کرتے ہوئے مقررین نے نئی شائع ہونے والی تفسیر کی علمی، فکری اور دینی اہمیت کو اجاگر کیا اور اسے عصرِ حاضر میں قرآنِ مجید کے فہم کے لئے ایک گراں قدر علمی خدمت قرار دیا۔ ان کا کہنا تھا کہ اس تفسیر میں قرآنِ کریم کے موضوعات، احکامات اور پیغام کو جامع، تحقیقی اور عام فہم انداز میں پیش کیا گیا ہے۔ شرکاء نے ڈاکٹر حبیب اللہ چشتی کی علمی و تحقیقی خدمات کو خراجِ تحسین پیش کرتے ہوئے اس تفسیر کو علما، طلبہ اور عام قارئین کے لئے یکساں طور پر ایک قیمتی علمی سرمایہ قرار دیا۔ انہوں نے امید ظاہر کی کہ یہ تصنیف قرآنِ مجید کے گہرے فہم اور تدبر کو فروغ دینے کے ساتھ ساتھ نوجوان نسل کو اس کی تعلیمات سے مزید قریب لانے میں معاون ثابت ہوگی۔ تقریب کے اختتام پر امتِ مسلمہ کے اتحاد، پاکستان میں امن و استحکام اور اسلام کی سربلندی کے لئے خصوصی دعائیں کی گئیں۔