سال نو 1448 ہجری کا استقبال، مسجد الحرام میں غلاف کعبہ کی تبدیلی کی روح پرور تقریب مکمل، فضائیں تکبیر و تہلیل سے گونج اٹھیں

خرم شہزاد

مکہ مکرمہ۔16جون (اے پی پی):نئے اسلامی سال 1448 ہجری کے آغاز پر مکہ مکرمہ میں خانہ کعبہ کا غلاف (کسوہ) تبدیل کرنے کی روح پرور اور پروقار تقریب انتہائی عقیدت و احترام کے ساتھ مکمل ہو گئی ۔ مسجد الحرام میں موجود ہزاروں زائرین نے تکبیر و تہلیل کی گونج میں اس ایمان افروز منظر کا مشاہدہ کیا۔حرمین شریفین انتظامیہ کی زیر نگرانی، سعودی عرب کے ماہر کاریگروں اور تکنیکی عملے نے چند گھنٹوں کی مسلسل محنت کے بعد پرانے غلاف کو اتار کر نیا کسوہ کعبۃ اللہ کی زینت بنا دیا۔ سعودی حکام کی جانب سے چند سال قبل وضع کردہ نئی روایت کے مطابق اب ہر سال 9 ذوالحجہ کے بجائے یکم محرم الحرام کی رات کو سال نو کے استقبال کے طور پر غلاف کی تبدیلی کا یہ مقدس عمل انجام دیا جاتا ہے۔

غلاف کی تبدیلی کے اس نازک اور مقدس مشن میں ڈیڑھ سو سے زائد تکنیکی ماہرین اور ہنرمندوں نے حصہ لیا۔ ماہرین نے سب سے پہلے حطیم کی سمت سے نئے غلاف کو خانہ کعبہ کی چھت تک پہنچایا۔نئے غلاف کے رخ کو اوپر سے باندھنے کے بعد پرانے غلاف کی رسیاں کھول کر اسے انتہائی مہارت سے نیچے سے سرکا کر الگ کر لیا گیا تاکہ ایک لمحے کے لیے بھی کعبۃ اللہ کی دیواریں غلاف سے خالی نہ رہیں۔ چاروں اطراف (رکن عراقی، رکن شامی، رکن یمانی اور رکن اسود) پر غلاف کو درست کرنے اور سلائی کرنے کے بعد سونے اور چاندی کے دھاگوں سے مزین بیلٹ (حزام) اور خانہ کعبہ کے دروازے کا خصوصی پردہ (برقع) نصب کر دیا گیا۔

کنگ عبدالعزیز کسوہ کمپلیکس میں تیار کیا گیا یہ نیا غلاف ریشم اور قیمتی دھاتوں کا شاہکار ہے۔ حکام کے مطابق غلاف کی تیاری میں 1,000 کلو گرام خالص سیاہ ریشم استعمال کیا گیا ہے۔ اس پر قرآنی آیات اور اسلامی نقوش کی سنہری کڑھائی کے لیے 120 کلو گرام سونےاور 100 کلو گرام چاندی کے دھاگے استعمال کیے گئے ہیں۔ اس پورے شاہکار کی کل لاگت کا تخمینہ لگ بھگ 20 ملین سعودی ریال ہے۔

تقریب کے اختتام پر حرمین شریفین انتظامیہ اور کلید بردار کعبہ نے پرانے غلاف (کسوہ) کو مکہ مکرمہ کے مخصوص گودام منتقل کر دیا جہاں روایت کے مطابق اسے مائع کے ذریعے محفوظ کیا جائے گا اور بعد ازاں صدارتی سطح پر بین الاقوامی سربراہان اور معززین کو تحفتاً پیش کیا جائے گا۔ دنیا بھر کے کروڑوں مسلمانوں نے اس روح پرور تقریب کو ٹیلی ویژن اور ڈیجیٹل میڈیا کے ذریعے براہ راست دیکھا۔