نائب وزیراعظم و وزیر خارجہ سینیٹر محمد اسحاق ڈار کی قاہرہ میں چار علاقائی چار ممالک (آر۔فور) کے وزرائے خارجہ اجلاس میں شرکت

قاہرہ۔21جون (اے پی پی):نائب وزیراعظم و وزیر خارجہ سینیٹر محمد اسحاق ڈار نے آج قاہرہ، مصر میں علاقائی چار ممالک (آر۔فور) کے وزرائے خارجہ کے چوتھے اجلاس میں شرکت کی، جس میں پاکستان، سعودی عرب، ترکیہ اور مصر کے وزرائے خارجہ شریک ہوئے۔ اتوار کو وزارت خارجہ سے جاری بیان کے مطابق وزراء نے اسلام آباد مفاہمتی یادداشت پر ہونے والی پیش رفت کا جائزہ لیا، اہم علاقائی اور عالمی پیش رفت پر تبادلۂ خیال کیا، اور خطے میں امن، استحکام اور خوشحالی کے فروغ کے لیے مکالمے، سفارت کاری اور مشترکہ کوششوں سے اپنی وابستگی کا اعادہ کیا۔

اجلاس میں آر۔فور فریم ورک کے تحت رابطوں کو مزید مضبوط بنانے اور عملی تعاون کو فروغ دینے پر بھی توجہ مرکوز کی گئی تاکہ مشترکہ چیلنجز سے نمٹا جا سکے اور دستیاب مواقع سے بھرپور استفادہ کیا جا سکے۔ قبل ازیں اجلاس کے موقع پر نائب وزیراعظم و وزیر خارجہ محمد اسحاق ڈار نے مصر کے صدر عبدالفتاح السیسی سے ملاقات کی، جس میں دوطرفہ تعلقات کے علاوہ علاقائی صورتحال اور آر۔فور پلیٹ فارم کے تحت تعاون سے متعلق امور پر تبادلۂ خیال کیا۔

پاکستان، سعودی عرب، ترکیہ اور مصر باہمی شراکت داری کو مزید مضبوط بنانے، سفارت کاری کو فروغ دینے اور ایک زیادہ پُرامن، مستحکم اور باہم مربوط خطے کے لیے اتفاقِ رائے کو آگے بڑھانے کے لیے مل کر کام کر رہے ہیں۔ اجلاس کے اختتام پر ایک مشترکہ اعلامیہ بھی جاری کیا گیا۔