’’محفوظ محرم ایپ‘‘اسلام آباد کے جلوسوں کے دوران سکیورٹی کے لیے گیم چینجر بن کر سامنے آئی

اسلام آباد۔25جون (اے پی پی):محفوظ محرم ایپ کو دارالحکومت میں جلوس کے شرکاء کی جانب سے زبردست پذیرائی ملی ہے، شہریوں نے اس کے آغاز کو ایک تاریخی سکیورٹی اقدام قرار دیا اور اس اہم قدم پر وزیر داخلہ سید محسن رضا نقوی اور اسلام آباد پولیس کو سراہا۔ میڈیا رپورٹ کے مطابق محرم کے اجتماعات کے دوران سکیورٹی کو مضبوط بنانے کے لیے تیار کی گئی ایپ صارفین کو مشکوک سرگرمیوں کی فوری اطلاع دینے، ہنگامی خدمات تک رسائی اور استعمال میں آسان ڈیجیٹل پلیٹ فارم کے ذریعے قانون نافذ کرنے والے اداروں سے جڑے رہنے کی اجازت دیتی ہے۔

امام بارگاہوں اور جلوس کے راستوں پر دکھائے گئے QR کوڈز نے شرکاء کو آسانی کے ساتھ ایپلی کیشن ڈاؤن لوڈ اور استعمال کرنے کے قابل بنا دیا ہے۔ بہت سے افراد نے اس اقدام کو ایک بروقت قدم قرار دیا جو ٹیکنالوجی کو عوامی تحفظ کے ساتھ جوڑتا ہے۔ انہوں نے کہا کہ ایپ نے اعتماد میں اضافہ کیا ہے اور کسی ہنگامی صورت حال میں مدد حاصل کرنا یا معلومات کا اشتراک کرنا آسان بنا دیا ہے۔ محرم کے جلوس میں شریک ایک شہری نے کہا کہ ہم وزیر داخلہ سید محسن رضا نقوی اور اسلام آباد پولیس کی کاوشوں کو اس طرح کی کارآمد سہولت متعارف کرانے پر سراہتے ہیں۔

انہوں نے مزید کہا کہ QR کوڈ سسٹم سادہ، قابل رسائی اور جلوسوں میں شرکت کرنے والے خاندانوں کے لیے تحفظ کا یقین دلاتا ہے۔ ایک اور شریک نے ریمارکس دیے کہ فوری رپورٹنگ کی خصوصیات اور ہنگامی رابطوں کی دستیابی محرم کے دوران شہریوں کے تحفظ کے لیے ایک فعال انداز کی عکاسی کرتی ہے۔ انہوں نے اس اقدام کو جدید پولیسنگ کی ایک مثال قرار دیا۔ جلوس کےشرکاء نے حکام پر زور دیا کہ محرم الحرام کے بعد بھی ڈیجیٹل پبلک سیفٹی اقدامات کو جاری رکھیں۔ انہوں نے کہا کہ محفوظ محرم ایپ نے یہ ظاہر کیا ہے کہ ٹیکنالوجی کس طرح شہریوں اور قانون نافذ کرنے والے اداروں کے درمیان تعاون کو مضبوط بناتے ہوئے محفوظ، پرامن اور اچھی طرح سے منظم مذہبی تقریبات کے انعقاد کو یقینی بنا سکتی ہے۔