بین المذاہب ہم آہنگی اور تمام برادریوں کے درمیان باہمی احترام کا فروغ حکومت کی اہم ترجیحات میں شامل ہے، حافظ طاہر اشرفی

اسلام آباد۔5جولائی (اے پی پی):پاکستان علما کونسل کے چیئرمین حافظ طاہر محمود اشرفی نے مذہبی ہم آہنگی، فرقہ وارانہ امن اور مختلف مذاہب کے درمیان باہمی افہام و تفہیم کی اہمیت پر زور دیتے ہوئے کہا ہے کہ عبادت گاہوں کا تحفظ ریاست کی بنیادی ذمہ داری ہے، تمام مذاہب کے ماننے والوں کے درمیان باہمی احترام پرامن بقائے باہمی اور قومی ہم آہنگی کے لیے ناگزیر ہے۔میڈیا چینلز سے گفتگو کرتے ہوئے انہوں نے کہا کہ تمام شہریوں کو ایک دوسرے کے مذاہب کا احترام کرنا چاہیے اور معاشرے میں سماجی اتحاد، رواداری اور برداشت کے فروغ کے لیے مل کر کام کرنا چاہیے۔

انہوں نے کہا کہ تمام مذاہب کے ماننے والوں کے درمیان باہمی احترام پرامن بقائے باہمی اور قومی ہم آہنگی کے لیے ناگزیر ہے۔انہوں نے کہا کہ صبر، برداشت اور باہمی احترام وہ بنیادی اقدار ہیں جو دیرپا امن کے قیام کے لیے ضروری ہیں۔حافظ طاہر محمود اشرفی نے کہا کہ ان اقدار کے تحفظ اور فروغ کے لیے معاشرے کے تمام طبقات کو مشترکہ کوششیں کرنا ہوں گی تاکہ ملک میں اتحاد، یکجہتی اور ہم آہنگی کو مزید مضبوط بنایا جا سکے۔

انہوں نے کہا کہ پاکستان نے تمام مذاہب کے ماننے والوں کو مکمل مذہبی آزادی فراہم کی ہے اور سکھ برادری سمیت دیگر اقلیتی برادریوں کے لیے محفوظ اور پرامن ماحول مہیا کرتے ہوئے مذہبی سیاحت کے فروغ کے لیے بھی اقدامات کیے جا رہے ہیں۔ انہوں نے کہا کہ متعلقہ ادارے زائرین کو ان کے دوروں کے دوران ہر ممکن سہولت فراہم کرنے کے لیے عملی اقدامات کر رہے ہیں۔

انہوں نے کہا کہ بین المذاہب ہم آہنگی اور تمام برادریوں کے درمیان باہمی احترام کا فروغ حکومت اور ریاست کی اہم ترجیحات میں شامل ہے، جبکہ مذہبی مقامات پر بہتر انتظامات اور سہولیات کی فراہمی مذہبی سیاحت، رواداری اور قومی یکجہتی کے فروغ کے لیے جاری کوششوں کا حصہ ہے۔