اسلام آباد کی مختلف یونیورسٹیوں کے طلباء و طالبات کا ٹریفک پولیس ہیڈکوارٹرز کا دورہ

اسلام آباد۔22جولائی (اے پی پی):مختلف یونیورسٹیوں کے طلباء و طالبات نے ٹریفک پولیس ہیڈکوارٹرز کا دورہ کیا۔ ترجمان پولیس کے مطابق اسلام آباد ٹریفک پولیس ایجوکیشن ونگ ٹیم نے سٹوڈنٹس کو مختلف شعبہ جات، ٹریفک پولیس کی کارکردگی اور ٹریفک قوانین کے متعلق آگاہ کیا۔ چیف ٹریفک آفیسر (سی ٹی او) اسلام آباد کائنات اظہر خان نے اسلام آباد ٹریفک پولیس کی جانب سے شہریوں کی سہولت اور بہتر ٹریفک نظام کے لیے شروع کیے گئے عوام دوست پولیسنگ پراجیکٹس کے حوالے سے مفید اور جامع معلومات فراہم کیں۔

انہوں نے بتایا کہ اسلام آباد ٹریفک پولیس جدید ٹیکنالوجی اور موثر حکمت عملی کے ذریعے شہریوں کو بہتر سفری سہولیات، ٹریفک قوانین سے آگاہی اور بروقت رہنمائی فراہم کرنے کے لیے مختلف اقدامات کر رہی ہے۔ ان منصوبوں کا بنیادی مقصد عوام کو سہولت فراہم کرنا، ٹریفک کے بہائو کو بہتر بنانا، حادثات میں کمی لانا اور شہریوں میں ٹریفک قوانین پر عملدرآمد کے حوالے سے شعور اجاگر کرنا ہے۔ انہوں نے شہریوں سے اپیل کی کہ وہ ٹریفک قوانین کی پابندی کریں، دوران سفر احتیاط سے گاڑی چلائیں اور محفوظ سفر کو یقینی بنانے کے لیے ٹریفک پولیس کے ساتھ بھرپور تعاون کریں۔ طلبہ و طالبات کو مختلف شعبہ جات کا دورہ بھی کرایا گیا۔