آئی سی سی انڈر 19 ویمنز ٹی ٹوئنٹی ورلڈ کپ ایشیا کوالیفائر کا آغازکل ہوگا

لاہور۔22جولائی (اے پی پی):آئی سی سی انڈر 19 ویمنز ٹی ٹوئنٹی ورلڈ کپ میں شرکت کرنے والی ٹیموں کیلئے ایشیا کوالیفائر کا آغاز ملائشیا میں کل سے ہوگا، جس میں ایشیا کی آٹھ ٹیمیں شرکت کر رہی ہیں۔ یہ علاقائی کوالیفائنگ ایونٹ 23 سے 29 جولائی تک ملائیشیا کے دارالحکومت کوالالمپور میں کھیلا جا ئے گا، جہاں تمام ٹیمیں عالمی کپ 2027 میں شرکت کے لیے ایشیا کی واحد دستیاب نشست حاصل کرنے کی کوشش کریں گی۔کوالیفائر کے میچز دو مقامات، بیایوماس کرکٹ اوول اور وائی ایس ڈی یو کے ایم کرکٹ اوول میں کھیلے جائیں گے۔

ایونٹ میں شریک آٹھ ٹیموں میں کویت، تھائی لینڈ، متحدہ عرب امارات، بھوٹان، ہانگ کانگ چائنا، میزبان ملائیشیا، میانمار اور قطر شامل ہیں۔کویت، تھائی لینڈ اور متحدہ عرب امارات نے 2024 ایشیا کوالیفائر میں اپنی کارکردگی کی بنیاد پر جگہ حاصل کی، جبکہ بھوٹان، ہانگ کانگ چائنا، ملائیشیا، میانمار اور قطر نے 30 اکتوبر 2025 تک آئی سی سی ویمنز ٹی ٹوئنٹی رینکنگ کی بنیاد پر کوالیفائی کیا۔تمام ٹیموں کو دو گروپس میں تقسیم کیا گیا ہے۔ گروپ اے میں ہانگ کانگ چائنا، ملائیشیا، قطر اور متحدہ عرب امارات شامل ہیں، جبکہ گروپ بی میں بھوٹان، کویت، میانمار اور تھائی لینڈ کو رکھا گیا ہے۔

لیگ مرحلے کے میچز 23 سے 26 جولائی تک کھیلے جائیں گے، جہاں ہر ٹیم تین میچز کھیلے گی۔ لیگ مرحلے کے اختتام پر ٹاپ چار ٹیمیں سیمی فائنل کے لیے کوالیفائی کریں گی، جبکہ باقی چار ٹیمیں پانچویں سے آٹھویں پوزیشن کے لیے پلے آف مقابلوں میں حصہ لیں گی۔سیمی فائنلز 28 جولائی کو ہوں گے، جبکہ فائنل سمیت تمام پوزیشن میچز 29 جولائی کو کھیلے جائیں گے۔ ٹورنامنٹ کی فاتح ٹیم آئی سی سی انڈر 19 ویمنز ٹی ٹوئنٹی ورلڈ کپ 2027 کے لیے ایشیا کی نمائندگی کرنے والی واحد ٹیم بنے گی۔واضح رہے کہ انڈر 19 ویمنز ٹی ٹوئنٹی ورلڈ کپ کا آغاز 2023 میں ہوا تھا۔