سندھ انسٹیٹیوٹ آف یورولوجی اینڈ ٹرانسپلانٹیشن میں عالمی یومِ فزیوتھراپی منایا گیا

کراچی۔ 08 ستمبر (اے پی پی):سندھ انسٹی ٹیوٹ آف یورولوجی اینڈ ٹرانسپلانٹیشن (ایس آئی یو ٹی) میں منگل کے روز عالمی یومِ فزیوتھراپی منایا گیا، جس کا مقصد مریضوں کی صحت یابی اور بحالی کے عمل میں فزیوتھراپی کی اہمیت کے ساتھ ساتھ بہتر معیارِ زندگی کے لیے اس کے کردار کے بارے میں آگاہی پیدا کرنا تھا۔رواں سال عالمی یومِ فزیوتھراپی کا موضوع فزیوتھراپی اور جسمانی سرگرمی کے ذریعے دل کے امراض اور فالج سے بچاؤ، ان کے مؤثر انتظام اور بحالیِ صحت میں اس کے کردار پر مرکوز ہے۔ اس موضوع کے تحت اس بات کو اجاگر کیا گیا کہ جسمانی سرگرمی اور بروقت بحالی مریضوں کو دوبارہ متحرک ہونے، اپنی روزمرہ زندگی کی طرف واپس آنے اور خود انحصاری حاصل کرنے میں مدد دیتی ہے۔

ایس آئی یو ٹی کی جانب سے جاری کردہ پریس ریلیز کے مطابق ایس آئی یو ٹی میں فزیوتھراپی بھی طبی خدمات کا ایک اہم حصہ ہے اور ہسپتال کی مرکزی عمارت میں ایک باقاعدہ اور سہولیات سے آراستہ فزیوتھراپی شعبہ کام کر رہا ہے۔ شعبے کے قیام کے بعد سے مریضوں کی بحالی اور جسمانی مشکلات پر قابو پانے میں مثبت نتائج سامنے آئے ہیں۔ایس آئی یو ٹی کی پانچ دہائیوں سے زائد عرصے پر محیط مفت علاج اور عزتِ نفس کے ساتھ بلاامتیاز طبی سہولیات فراہم کرنے کی فلسفے کے تحت عالمی یومِ فزیوتھراپی کی سرگرمیوں نے اس بات کو بھی اجاگر کیا کہ معیاری صحت کی سہولت صرف بیماری کے علاج تک محدود نہیں بلکہ مریض کو صحت یاب کرکے اسے دوبارہ معمول کی زندگی کی طرف لانا بھی طبی نگہداشت کا اہم حصہ ہے۔