برطانیہ کا سعودی عرب کو حوثیوں کے خلاف دفاعی فوجی معاونت فراہم کرنے کا اعلان

لندن۔22ستمبر (اے پی پی):برطانیہ کے وزیرِ اعظم اینڈی برنہم نے کہا ہے کہ برطانیہ سعودی عرب کو فضائی ایندھن بھرنے کی معاونت فراہم کرے گا۔ بی بی سی کے مطابق یہ فیصلہ یمن میں ایران کے حمایت یافتہ حوثیوں کی جانب سے سعودی عرب پر کیے گئے حملوں کے ردِعمل میں کیا گیا ہے۔برطانیہ کی جانب سے سعودی عرب کی معاونت کے اعلان پر آئندہ چند روز میں عمل درآمد شروع کر دیا جائے گا اور اس میں ایک برطانوی طیارہ ’’وائجر‘‘ شامل ہوگا، جو قبرص میں واقع آر اے ایف اکروتیری سے آپریٹ کرے گا۔برطانوی وزیراعظم نے کہا کہ یہ فیصلہ سعودی عرب کی جانب سے فوجی معاونت کی درخواست کے بعد کیا گیا، جسے انھوں نے وزیرِ دفاع ویس سٹریٹنگ اور وزیرِ خارجہ ایڈ ملی بینڈ کے مشورے پر منظور کیا۔ برطانوی حکام نے کہا ہے کہ یہ پیشکش محدود مدت کے لیے ہے اور ابتدائی طور پر اس کا دورانیہ چند ہفتے ہو سکتا ہے۔برطانوی حکام کے مطابق دفاعی معاونت میں سعودی فضائیہ کے طیاروں کو آنے والے حوثی میزائلوں اور ڈرونز کو مار گرانے میں مدد فراہم کرنا بھی شامل ہو سکتا ہے۔