ہری کین انگلینڈ کے عظیم ترین فٹ بالر، ریکارڈز کی نئی تاریخ رقم کرنے کے قریب پہنچ گئے

لندن ۔6اکتوبر (اے پی پی):انگلینڈ فٹ بال ٹیم کے کپتان ہری کین جمہوریہ چیک کے خلاف یوئیفا نیشنز لیگ کے اہم میچ میں میدان میں اتر کر ایک اور تاریخ رقم کرنے کے قریب پہنچ گئے ہیں، جہاں وہ پیٹر شلٹن کا 125 عالمی میچز کھیلنے کا تاریخی ریکارڈ برابر کر لیں گے۔ بی بی سی کے مطابق 33 سالہ سٹار فارورڈ ہری کین نے مارچ 2015 میں لتھوانیا کے خلاف اپنے کیریئر کے پہلے ہی میچ میں محض 79 سیکنڈز کے اندر پہلا انٹرنیشنل گول داغ کر شاندار سفر کا آغاز کیا تھا اور تب سے اب تک وہ 124 میچز میں 89 گولز کے ساتھ انگلینڈ کی تاریخ کے سب سے کامیاب سکورر بن چکے ہیں۔ وہ بڑے عالمی ٹورنامنٹس کے 36 میچز میں 21 گولز سکور کر کے گیری لائنکر کے 10 گولز کا ریکارڈ بہت پیچھے چھوڑ چکے ہیں، جبکہ انگلینڈ کے دوسرے کامیاب ترین سکورر وین روبرٹ کے 53 گولز کے مقابلے میں ہری کین کو 36 گولز کی بڑی برتری حاصل ہے۔ اگرچہ ان کے شاندار کیریئر میں 1966 کے بعد کوئی بڑا عالمی کپ نہ جیت پانے کی کمی موجود ہے، لیکن اس کے باوجود وہ جدید دور میں انگلینڈ کے سب سے بااثر اور اہم ترین کھلاڑی کے طور پر سامنے آئے ہیں جس کے باعث انہیں ملک کی تاریخ کے عظیم ترین فٹ بالرز کی فہرست میں سرفہرست شمار کیا جا رہا ہے۔