پاکستانی ویٹ لفٹرز کی ایشین ماسٹرز اینڈ گرینڈ پری میں مختلف کیٹیگریز میں شاندار کارکردگی

اسلام آباد۔22اکتوبر (اے پی پی):پاکستانی ویٹ لفٹرز نے دوسری ایشین ماسٹرز اینڈ گرینڈ پری ویٹ لفٹنگ چیمپئن شپ میں شاندار کارکردگی کا مظاہرہ کرتے ہوئے مردوں کی مختلف عمر اور وزن کی کیٹیگریز میں نمایاں پوزیشنیں حاصل کرلیں۔جمعرات کو ہونے والے مقابلوں کے نتائج کے مطابق اکبر علی نے مردوں کی 50 سے 70 کلوگرام کیٹیگری میں مجموعی طور پر 190 کلوگرام وزن اٹھا کر پہلی پوزیشن حاصل کی۔ انہوں نے سنیچ میں 80 کلوگرام جبکہ کلین اینڈ جرک میں 110 کلوگرام وزن اٹھایا۔وقار احمد بٹ نے مردوں کی 55 سے 65 کلوگرام کیٹیگری میں 142 کلوگرام وزن اٹھا کر پہلی پوزیشن حاصل کی۔ ان کی کارکردگی میں سنیچ کے 67 اور کلین اینڈ جرک کے 75 کلوگرام وزن شامل تھے۔

احمد الیاس نے مردوں کی 55 سے 75 کلوگرام کیٹیگری میں مجموعی طور پر 105 کلوگرام وزن اٹھا کر پہلی پوزیشن حاصل کی جبکہ محمود ہیرا نے 55 سے 110 کلوگرام کیٹیگری میں 130 کلوگرام وزن اٹھا کر پہلی پوزیشن اپنے نام کی۔ریاست علی نے مردوں کی 55 سال سے زائد عمر کی 110 کلوگرام سے زائد وزن کیٹیگری میں مجموعی طور پر 135 کلوگرام وزن اٹھا کر پہلی پوزیشن حاصل کی۔مردوں کی 55 سے 95 کلوگرام کیٹیگری میں تاجکستان کے عبدللو باقائیوف نے 205 کلوگرام وزن اٹھا کر پہلی پوزیشن حاصل کی جبکہ پاکستان کے ندیم ہاشمی 97 کلوگرام وزن اٹھا کر دوسری پوزیشن پر رہے۔

بحرین کے علی سیف اللہ قاہرامان نے مردوں کی 50 سے 95 کلوگرام کیٹیگری میں مجموعی طور پر 215 کلوگرام وزن اٹھا کر پہلی پوزیشن حاصل کی۔پاکستانی ویٹ لفٹرز کی مختلف کیٹیگریز میں کامیابیوں نے ایونٹ میں ان کی مجموعی کارکردگی کو نمایاں کیا۔