برسلز۔27جنوری (اے پی پی):برسلز میں پاکستانی سفارت خانے نے 5 فروری کو یوم یکجہتی کشمیر کی مناسبت سے ایک ہفتہ کی تصویری نمائش کا اہتمام کیا ہے جس میں بھارتی غیر قانونی طور پر مقبوضہ جموں و کشمیر کے لوگوں کی ہمت اور جدوجہد کو اجاگر کیا گیا ہے۔
یہ نمائش مقبوضہ کشمیر کے عوام کو درپیش جاری مشکلات کو تصاویر کے ذریعے اجاگر کرتی ہے۔ اس کا مقصد خطے میں انسانی حقوق کی خلاف ورزیوں کے بارے میں عالمی بیداری کو بڑھانے کے ساتھ ساتھ بھارتی غیر قانونی مقبوضہ جموں و کشمیر کے لوگوں کے لیے انصاف، وقار اور امن کو یقینی بنانے کے لیے فوری بین الاقوامی توجہ کا مطالبہ کرنا ہے۔برسلز میں پاکستانی سفارتخانہ سے جاری ایک پریس ریلیز کے مطابق نمائش کا افتتاح ناظم الامور سید فراز حسین زیدی نے کیا۔ افتتاحی تقریب سے اپنے خطاب میں انہوں نے اقوام متحدہ کی سلامتی کونسل کی قراردادوں کے مطابق کشمیری عوام کی حق خود ارادیت کی منصفانہ جدوجہد میں پاکستان کی مستقل حمایت کا اعادہ کیا۔ انہوں نے کہا کہ یہ نمائش کشمیری عوام کی آواز کو بلند کرنے کے لیے پاکستان کے عزم کی عکاس ہے۔ دنیا کے لیے ضروری ہے کہ وہ مقبوضہ کشمیر میں ناانصافیوں کو ختم کرنے کے لیے فیصلہ کن اقدامات کرے۔
یہ نمائش شرکاء کو کشمیری عوام کو درپیش حالات پر غور کرنے کا ایک منفرد موقع فراہم کرے گی۔ یہ ایونٹ بھارت کی طرف سے اقوام متحدہ کی سلامتی کونسل کی قراردادوں اور بین الاقوامی قوانین کی براہ راست خلاف ورزیاں کرتے ہوئے کئے گئے غیر قانونی اقدامات کی بھی نشاندہی کرتا ہے جن کی وجہ سے کشمیری عوام کو ان کے بنیادی حقوق اور آزادیوں سے مسلسل محروم رکھا جا رہا ہے۔
Short Link: https://urdu.app.com.pk/urdu/?p=552408
