لاہور پریس کلب کے نومنتخب عہدیداروں اور گورننگ باڈی کے کامیاب امیدواروں کو مبارکباد دی ہے
میڈیا سیل بلاول ہاوَس کی جانب سے جاری کردہ بیان کے مطابق پی پی پی چیئرمین نے اپنے تہنیتی پیغام میں ارشد انصاری کو لاہور پریس کلب کا دوبارہ صدر منتخب ہونے پر مبارکباد دی ۔
انہوں نے جنرل سیکریٹری زاہد عابد سمیت تمام کامیاب امیدواروں کے لیے بھی نیک خواہشات کا اظہار کیا۔
انہوں نے کہا کہ آزادی اظہار اور بحالیِ جمہوریت کی جدوجہد میں لاہور پریس کلب نے ہمیشہ علمدار ادارے کاکردار نبھایا ہے۔
انہوں نے اس امید کا اظہار کیا کہ نومنتخب قیادت اپنی بھرپور صلاحیتوں سے صحافتی برادری کے مسائل کے حل کے لیے کام کرنے کے ساتھ ساتھ ملک میں آزاد صحافت کی اقدار کو پروان چڑھانے کی کاوشوں میں بھی اپنا مزید حصہ شامل کر ے گی۔چیئرمین بلاول بھٹو زرداری نے لاہور پریس کلب سمیت ملک بھر کے صحافیوں کو یقین دلایا کہ پاکستان پیپلز پارٹی صحافی برادری کے حقوق اور ان کے جائز مطالبات کی حمایت پر کسی مصلحت کا شکار نہیں ہوگی۔
