حج 2025 کی تیاری میں کسی قسم کی لاپرواہی برداشت نہیں کی جائے گی، معاونین کے انتخاب میں شفافیت اور میرٹ کو ملحوظ خاطر رکھا جائے، وزیراعظم

اسلام آباد۔20جنوری (اے پی پی):وزیراعظم محمد شہباز شریف نے حجاج کرام کو ہرقسم کی معاونت اور سہولت کی فراہمی یقینی بنانے کی ہدایت کرتےہوئے کہا ہے کہ حج 2025 کی تیاری میں کسی قسم کی لاپرواہی برداشت نہیں کی جائے گی، حجاج کرام کے لئے معاونین کے انتخاب کے طریقہ کار میں شفافیت اور میرٹ کو ملحوظ خاطر رکھا جائے۔ وزیراعظم آفس کے میڈیا ونگ سے جاری بیان کے مطابق ا ن خیالات کا اظہار وزیراعظم نے پیر کو یہاں حج 2025 کی تیاریوں کے سلسلہ میں جائزہ اجلاس کی صدارت کرتےہوئے کیا۔ اجلاس میں وفاقی وزرا احد خان چیمہ، چوہدری سالک حسین اور متعلقہ اعلیٰ حکام نے شرکت کی۔

اجلاس میں وزیرِ اعظم کو حج 2025 کی تیاریوں پر تفصیلی بریفنگ دی گئی۔اجلاس کو بتایا گیا کہ گزشتہ برس کی طرح اس سال بھی حجاج کرام کو سمز کی فراہمی پاکستان سے کی جائے گی اور حجاج کی معاونت کے لئے حج موبائل ایپلی کیشن بھی فعال ہے۔ اجلاس کو حج فنڈ پر پیش رفت سے آگاہ کرتے ہوئے بتایا گیا کہ اس پر کام حتمی مراحل میں ہے۔

اجلاس میں وزیراعظم نے کہاکہ حج 2025 کی تیاری میں کسی قسم کی لاپرواہی قبول نہیں۔حج 2025 میں حجاج کرام کو ہر قسم کی معاونت و سہولت یقینی بنائی جائے۔حج 2025 کی تیاریوں کے حوالے سے ایک جامع بریفنگ تیار کرکے آئندہ چند روز میں پیش کی جائے۔ حجاج کرام کو حج 2025 کے حوالے سے تربیت کی بہترین سہولیات فراہم کی جائیں۔ وزیرِ اعظم نے حج ڈیوٹی پر اچھی شہرت کے قابل افسران تعینات کرنے کی ہدایت کی۔

وزیراعظم نے کہاکہ حجاج کرام اللہ کے مہمان ہیں، حکومت کی جانب سے ان کی خدمت و معاونت میں کسی قسم کی لاپرواہی قبول نہیں کروں گا۔وزیراعظم نے ہدایت کی کہ حجاج کرام کی رہائش، سفری و دیگر سہولیات کا خاص خیال رکھا جائے۔حجاج کرام کے لئے معاونین کے انتخاب کے طریقہ کار میں شفافیت اور میرٹ کو ملحوظِ خاطر رکھا جائے۔