آزاد کشمیر کے مسائل کے حل کا واحد راستہ شفاف اور بروقت انتخابات ہیں، بیرسٹر عقیل ملک

اسلام آباد۔4جولائی (اے پی پی):وزیر مملکت برائے قانون بیرسٹر عقیل ملک نے کہا ہے کہ آزاد کشمیر کے مسائل کے حل کا واحد راستہ شفاف اور بروقت انتخابات ہیں، انتخابات آئین کے مطابق مقررہ وقت پر ہوں گے، ان میں کسی قسم کی تاخیر یا التوا نہیں ہوگا، عوام نے پاکستان مسلم لیگ (ن) کی کارکردگی پر مکمل اعتماد کا اظہار کیا۔ ہفتہ کو نجی ٹی وی سے گفتگو کرتے ہوئے انہوں نے کہا کہ مسلم لیگ (ن) آزاد کشمیر کے مسائل کو ترجیحی بنیادوں پر حل کرنے اور خطے میں ترقی و خوشحالی کو یقینی بنانے کے لیے پُرعزم ہے۔ بیرسٹر عقیل ملک نے بتایا کہ آزاد جموں و کشمیر کے آئندہ انتخابات کی تیاریاں زور و شور سے جاری ہیں اور سیاسی سرگرمیوں میں بھی تیزی آ رہی ہے۔ انہوں نے مزید کہا کہ انتخابات قانونی اور آئینی دائرہ کار کے تحت پرامن، شفاف اور منصفانہ انداز میں منعقد کیے جائیں گے۔ایک سوال کے جواب میں انہوں نے کہا کہ پاکستان تحریک انصاف (پی ٹی آئی) کو جیل میں اپنے بانی کو فراہم کی جانے والی سہولتوں کے بارے میں بے بنیاد الزامات لگانے کے بجائے سیاسی بلوغت کا مظاہرہ کرنا چاہیے۔انہوں نے وضاحت کی کہ جیل قوانین کے مطابق بانی پی ٹی آئی کو تمام بنیادی اور ضروری سہولتیں فراہم کی جا رہی ہیں، جن میں ورزش، ناشتہ اور صحت مند معمولاتِ زندگی شامل ہیں۔ انہوں نے مزید کہا کہ قانونی ضابطوں کے مطابق اہل خانہ سے رابطے کی سہولت بھی میسر ہے۔انہوں نے کہا کہ مقررہ قواعد و ضوابط کے تحت ملاقاتوں کا بھی انتظام کیا گیا ہے، جن میں اہل خانہ سے ملاقاتیں شامل ہیں، جبکہ تمام انتظامات سیکیورٹی اور حفاظتی تقاضوں کے مطابق یقینی بنائے جا رہے ہیں۔ایک اور سوال کے جواب میں وزیر مملکت نے کہا کہ قانون کی نظر میں تمام قیدی برابر ہیں اور ان کے ساتھ قائم شدہ قانونی اور جیل قوانین کے مطابق یکساں سلوک کیا جاتا ہے۔انہوں نے مزید کہا کہ پنجاب حکومت جیل اصلاحات کے لیے قابلِ تحسین اقدامات کر رہی ہے، جن کا مقصد قیدیوں کو بہتر سہولتیں فراہم کرنا اور اصلاحی اداروں کے انتظام و انصرام کو مزید مؤثر بنانا ہے۔