اسرائیل کا غزہ میں امدادی تنظیم ایم ایس ایف کو کام سے روکنے کا اعلان

تل ابیب ۔2فروری (اے پی پی):اسرائیل نےکہا ہے کہ وہ غزہ میں بین الاقوامی خیراتی ادارے ڈاکٹرز وِدآؤٹ بارڈرز (ایم ایس ایف) کی انسانی بنیادوں پر کارروائیاں ختم کر رہا ہے اور دعویٰ کیا ہے کہ تنظیم اپنے فلسطینی عملے کی فہرست فراہم کرنے میں ناکام رہی ہے۔العربیہ کے مطابق امورِ تارکین وطن اور یہود دشمنی کا مقابلہ کرنے والی وزارت نے کہا کہ وزارت غزہ کی پٹی میں (ایم ایس ایف کی) سرگرمیاں ختم کرنے کے لیے کام کر رہی ہے۔خطے میں کام کرنے والی تمام انسانی تنظیموں کے لیے مقامی ملازمین کی فہرستیں جمع کروانا ضروری ہے جس میں ایم ایس ایف کی طرف سے ناکامی کے بعدیہ فیصلہ کیا گیا ہے۔

وزارت نے بتایا اور مزید کہا کہ گروپ اپنا کام بند کر کے 28 فروری تک غزہ چھوڑ دے گا۔دسمبر میں وزارت نے اعلان کیا کہ وہ ایم ایس ایف سمیت 37 امدادی تنظیموں کو یکم مارچ سے غزہ میں کام کرنے سے روک دے گی کیونکہ وہ اپنے فلسطینی عملے کے بارے میں تفصیلی معلومات فراہم کرنے میں ناکام رہی ہیں۔وزارت نے الزام عائد کیا تھا کہ ایم ایس ایف کے دو ملازمین کے فلسطینی گروپوں حماس اور اسلامی جہاد سے روابط تھے جس کی طبی خیراتی ادارے نے سختی سے تردید کی ہے۔

وزارت نے بتایا کہ ایم ایس ایف نے جنوری کے اوائل میں عہد کیا تھا کہ وہ اسرائیلی حکام کے حسبِ ضرورت اپنے عملے کی فہرست فراہم کرے گا۔وزارت نے کہا کہ اعلانیہ عزم کے باوجود تنظیم نے فہرستیں منتقل کرنے سے گریز کیا۔ بعد میں ایم ایس ایف نے اپنے سابقہ بیانات اور قواعد و ضوابط کے برعکس اعلان کیا کہ اس کا رجسٹریشن کے عمل میں پیش رفت کا بالکل بھی ارادہ نہیں تھا۔

وزارت نے مزید کہا کہ ضوابط کے مطابق ایم ایس ایف اپنا کام بند کر کے 28 فروری 2026 تک غزہ کی پٹی سے روانہ ہو جائے گا۔واضح رہے جمعہ کو اپنی ویب سائٹ پر ایک بیان میں ایم ایس ایف نے تسلیم کیا کہ اس نے ایک "غیر معمولی اقدام” کے طور پر اپنے فلسطینی اور بین الاقوامی عملے کے ناموں کی فہرست اسرائیلی حکام کو فراہم کرنے پر اتفاق کیا تھا۔

خیراتی ادارے نے کہا کہ تاہم بارہا کوششوں کے باوجود یہ واضح ہو گیا کہ ہم اسرائیلی حکام کو مطلوبہ ٹھوس یقین دہانیاں کروانے میں ناکام رہے۔ ان میں یہ بات بھی شامل تھی کہ عملے کی کوئی بھی معلومات صرف ادارے کے بیان کردہ انتظامی مقصد کے لیے استعمال کی جائے گی اور اس سے ہمارے ساتھیوں کو خطرہ نہیں ہو گا۔ایم ایس ایف نے کہا کہ اسے ان حوالوں سے یقین دہانی نہیں ملی تھی اس لیے وہ اس نتیجے پر پہنچا کہ ہم موجودہ حالات میں عملے کی معلومات فراہم نہیں کریں گے۔