اسلام آباد میں عالمی جونیئر ٹینس چیمپئن شپ جے-60 جاری، بارش کے باعث میچز مؤخر

اسلام آباد۔4نومبر (اے پی پی):پاکستان ٹینس فیڈریشن (پی ٹی ایف) کے زیرِ اہتمام آئی ٹی ایف پاکستان نیشنل فوڈز ورلڈ جونیئر ٹینس چیمپئن شپ جے-60 اسلام آباد کے پی ٹی ایف-ایس ڈی اے ٹینس کمپلیکس میں جاری ہے۔ یہ پہلا موقع ہے کہ پاکستان میں جے-60 کی کیٹگری کا بین الاقوامی ٹورنامنٹ منعقد ہو رہا ہے۔ اس ایونٹ میں چین، جاپان، قازقستان، کوریا، روس، ترکیہ، برطانیہ، چیک ریپبلک، لیتھوانیا، نیپال، امریکہ اور میزبان پاکستان سمیت متعدد ممالک کے جونیئر کھلاڑی شرکت کر رہے ہیں۔ ٹورنامنٹ کو پاکستان کی معروف کمپنی نیشنل فوڈز نے سپانسر کیا ہے۔ پی ٹی ایف کے صدر اعصام الحق قریشی نے اس موقع پر کہا کہ پاکستان میں پہلی مرتبہ جے-60 ایونٹ کا انعقاد ہمارے لئے بڑے اعزاز کی بات ہے، ہم آئندہ سال دو جے-60 اور پانچ جے-30 جونیئر ٹورنامنٹس کے انعقاد کا بھی ارادہ رکھتے ہیں تاکہ نوجوان کھلاڑیوں کو زیادہ سے زیادہ عالمی مواقع میسر آئیں۔

اسلام آباد میں بارش کے باعث آج کے نامکمل میچز کل منعقد کئے جائیں گے۔آج کے نتائج درج ذیل ہیں : گرلز سنگلز، فرسٹ راؤنڈ کارولینا لیگائی (قازقستان) نے رانیا بُز (امریکا) کو 6-0، 6-0 سے ہرایا۔ ہانیہ امان منہاس (سعودی عرب) نے زنائیسہ نور (پاکستان) کو 6-0، 6-0 سے شکست دی۔ سیریفی پِلِن ساری (ترکیہ) نے آمنہ علی قیوم (پاکستان) کو 6-2، 6-0 سے ہرایا۔ دنیز کاقل (ترکیہ) نے زارا خان (پاکستان) کو 6-0، 6-0 سے شکست دی۔ اکرن لال یاووز (ترکیہ) نے سہاء علی (پاکستان) کو 6-0، 6-1 سے ہرایا۔ یہ وون لی (کوریا) نے اَیْرس توکاک (ترکیہ) کو 6-1، 6-4 سے شکست دی۔ پولینا باربانوا (قازقستان) نے ایو یوشیدا (جاپان) کو 6-2، 6-2 سے ہرایا۔ وراوارا روبتسووا (روس) نے زیہان فینگ (چین) کو 6-4، 6-2 سے ہرایا۔ میچز کل صبح 10:00 بجے سے شروع ہوں گے۔