اسلام آباد میں پانی کے منصوبوں کیلئے فرانسیسی ڈویلپمنٹ ایجنسی کی تکنیکی تعاون میں دلچسپی

اسلام آباد۔9مئی (اے پی پی):فرانسیسی ڈویلپمنٹ ایجنسی نے اسلام آباد میں پانی کے متعدد شعبہ جاتی منصوبوں کے لیے تکنیکی تعاون فراہم کرنے میں دلچسپی کا اظہار کیا ہے، جن میں پانی کے معیار کو بہتر بنانا، ذخیرہ کی گنجائش بڑھانا اور وفاقی دارالحکومت میں پانی کی قلت کا حل شامل ہے۔یہ مفاہمت چیئرمین کیپٹل ڈویلپمنٹ اتھارٹی (سی ڈی اے) اور اسلام آباد کے چیف کمشنر سہیل اشرف اور اے ایف ڈی کے کنٹری ڈائریکٹر مارک انٹوان کے درمیان سی ڈی اے ہیڈ کوارٹرز میں ہونے والی ملاقات کے دوران ہوئی۔ملاقات میں سی ڈی اے ممبر پلاننگ اینڈ ڈیزائن محمد عمیر، ڈائریکٹر جنرل اسلام آباد واٹر اور دیگر سینئر افسران نے شرکت کی۔ملاقات کے دوران دونوں فریقوں نے پانی کے شعبے میں جاری اصلاحات اور ترقیاتی منصوبوں پر تبادلہ خیال کیا جس میں خاص طور پر پائیدار حل اپنانے پر توجہ مرکوز کی تاکہ اسلام آباد کے شہریوں کو مسلسل صاف اور محفوظ پینے کا پانی دستیاب ہو سکے۔

اس موقع پر اظہار خیال کرتے ہوئے چیئرمین سی ڈی اے سہیل اشرف نے کہا کہ اتھارٹی شہر کے واٹر انفراسٹرکچر کو بہتر بنانے کے لیے جدید اور پائیدار اقدامات کو ترجیح دے رہی ہے۔انہوں نے کہا کہ پانی کے ضیاع کو روکنے، لائن لاسز کم کرنے اور موثر پانی کے استعمال اور تحفظ کی پریکٹسز کو فروغ دینے کی کوششیں جاری ہیں۔ملاقات میں سِملی واٹر فلٹریشن پلانٹ کی تجویز کردہ اپ گریڈیشن اور بحالی کا جائزہ بھی لیا گیا، جس میں سِملی ڈیم سے مرکزی پائپ لائن پر کام شامل ہے تاکہ دارالحکومت میں بڑھتی ہوئی پانی کی طلب کو پورا کیا جا سکے۔

سِملی ڈیم کی سٹوریج کی گنجائش بڑھانے پر بھی بات چیت کی گئی، جس کے لیے اے ایف ڈی مکمل تکنیکی تعاون فراہم کرنے پر غور کرے گی۔شرکاء نے شاہدرہ اور دوترہ ڈیم پروجیکٹس پر پیش رفت کا جائزہ بھی لیا، جو مسلسل پانی کی فراہمی یقینی بنانے اور اسلام آباد کی مستقبل کی ضروریات کو پورا کرنے میں مددگار ثابت ہوں گے۔اے ایف ڈی کے وفد نے کہا کہ ان کی تنظیم اسلام آباد میں صاف پانی کی فراہمی کے اقدامات اور پانی کی قلت کے چیلنجز سے نمٹنے کے لیے تکنیکی تعاون کے ذریعے تعاون کرنے کا پابند ہے۔

انہوں نے بتایا کہ شہر میں تجویز کردہ مختلف واٹر پروجیکٹس کی تکنیکی اور مالی نوعیت کی امکانیت کا جائزہ لینے کے لیے ایک جامع فیزیبلٹی سٹڈی کی جائے گی۔چیئرمین سی ڈی اے نے کہا کہ پانی کی قلت پر قابو پانا اور شہریوں کو محفوظ اور معیاری پانی کی فراہمی اتھارٹی کی سرفہرست ترجیحات میں شامل ہے۔