اسلام آباد میں 18 نومبر سے تمام گاڑیوں کیلئے شہر بھر میں ای-ٹیگ نظام کا آغاز ہوگا

اسلام آباد۔16نومبر (اے پی پی):اسلام آباد کنٹرولڈ گاڑی انٹری سسٹم کی طرف بڑھ رہا ہے، ضلعی انتظامیہ وفاقی دارالحکومت کے اندر چلنے والی تمام گاڑیوں کے لیے لازمی ای-ٹیگ اسٹیکرز متعارف کرانے کی تیاری کر رہی ہے۔یہ نئی پابندی 18 نومبر سے نافذ ہوگی جس کا مقصد گاڑیوں کی مانیٹرنگ میں بہتری اور شہر بھر میں سکیورٹی کو مضبوط بنانا ہے۔ حکام کے مطابق اسلام آباد کے مختلف مقامات پر مخصوص پوائنٹس قائم کیے جائیں گے جہاں گاڑیوں کے مالکان رجسٹریشن دستاویزات دکھا کر ای-ٹیگ حاصل کر سکیں گے۔اس حوالے سے ڈپٹی کمشنر اسلام آباد عرفان نواز میمن نے کہا کہ شہریوں کو تمام فیسلیٹیشن پوائنٹس سے پہلے ہی آگاہ کر دیا جائے گا جہاں سے یہ ٹیگز حاصل کیے جا سکیں گے۔

یہ اسٹیکرز وفاقی دارالحکومت کی سڑکوں پر چلنے والی ہر گاڑی کے لیے لازمی ہوں گے، چاہے گاڑی اسلام آباد میں رجسٹرڈ ہو یا کسی اور صوبے میں۔ڈی سی نے واضح کیا کہ ای ٹیگ حاصل کرنے کے لیے شہریوں کو صرف سرکاری نامزد پوائنٹس پر ہی جانا ہوگا، اس کیلئے گاڑی کا اصل رجسٹریشن کارڈ ساتھ لانا ضروری ہوگا۔ انتظامیہ شہر بھر میں متعدد سہولیات پوائنٹس قائم کر رہی ہے تاکہ جاری عمل کو آسان بنایا جا سکے اور لمبی قطاروں سے بچا جا سکے۔دوسری جانب ایکسائز اینڈ ٹیکسیشن ڈائریکٹر بلال اعظم نے تصدیق کی کہ اگر کسی گاڑی پر پہلے سے موٹروے حکام کی جانب سے جاری کردہ ایم-ٹیگ موجود ہے تو وہ اسلام آباد کے لیے بھی قابل قبول ہوگا اور ایسی صورت میں نیا ای ٹیگ لینے کی ضرورت نہیں ہوگی۔

بلال اعظم نے بتایا کہ ایکسائز ڈیپارٹمنٹ نے پائلٹ پروجیکٹ کے طور پر آئی-8 کے کچنار پارک میں ای ٹیگز کا اجراء شروع کر دیا ہے، جہاں ایف ڈبلیو او کی دو گاڑیاں شہریوں کو سہولت فراہم کر رہی ہیں۔ انہوں نے کہا کہ شہر کے دیگر علاقوں میں بھی مزید پوائنٹس قائم کئے جائیں گے تاکہ مختلف مقامات کے رہائشیوں کے لیے سہولت کو یقینی بنایا جا سکے۔انہوں نے شہریوں سے تعاون کی درخواست کرتے ہوئے کہا کہ وہ اپنی گاڑیوں پر ای ٹیگ لگوائیں تاکہ انتظامیہ مانیٹرنگ اور سکیورٹی کو مزید مؤثر بنا سکے۔حکام نے زور دیا کہ شہریوں کا تعاون نئے انٹری سسٹم کو کامیاب بنانے اور دارالحکومت کے تحفظ کے وسیع تر اقدامات کو تقویت دینے میں اہم کردار ادا کرے گا۔