امریکا سعودی عرب کو ایف-35 اسٹیلتھ لڑاکا طیارے فروخت کرے گا، ڈونلڈ ٹرمپ

واشنگٹن ۔18نومبر (اے پی پی):امریکی صدر ڈونلڈ ٹرمپ نے کہا ہے کہ امریکا سعودی عرب کو ایف-35 اسٹیلتھ لڑاکا طیارے فروخت کرے گا۔ یہ اعلان ایسے وقت میں سامنے آیا ہے جب سعودی ولی عہد شہزادہ محمد بن سلمان منگل کے روز وائٹ ہاؤس میں اہم مذاکرات کے لیے پہنچ رہے ہیں۔ صحافیوں سے گفتگو میں امریکی صدر نے تصدیق کی کہ امریکا سعودی عرب کو ایف-35 طیارے دینے پر رضامند ہے، اور انہوں نے سعودی عرب کو ’’بہترین اتحادی‘‘ قرار دیا۔

سعودی عرب طویل عرصے سے ایف-35 طیاروں کے حصول کا خواہش مند رہا ہے، جو فی الحال مشرقِ وسطیٰ میں صرف اسرائیل کے پاس ہیں۔ ٹرمپ کی منظوری اس صورت میں آئی ہے کہ نیویارک ٹائمز کی حالیہ رپورٹ کے مطابق امریکی حکام نے خدشہ ظاہر کیا تھا کہ اگر یہ طیارے سعودی عرب کو دیے گئے تو چین ممکنہ طور پر اس جدید ٹیکنالوجی تک رسائی حاصل کر سکتا ہے۔

امریکا اب تک ایف-35 طیارے صرف اپنے قریبی اتحادی ممالک کو فروخت کرتا آیا ہے، جن میں متعدد یورپی نیٹو ریاستیں اور اسرائیل شامل ہیں۔ امریکا نے 2019 میں ترکی کو ایف-35 پروگرام سے اس وقت نکال دیا تھا جب انقرہ نے روسی فضائی دفاعی نظام خریدنے کا فیصلہ کیا، جس سے خدشہ پیدا ہوا کہ روس ایف-35 کی حساس ٹیکنالوجی تک رسائی حاصل کر سکتا ہے۔