اوپیک پلس کے سات ممالک کی جانب سے ستمبر میں تیل کی پیداوار میں ایک لاکھ 88 ہزار بیرل یومیہ اضافہ

ماسکو۔1ستمبر (اے پی پی):اوپیک پلس کے سات ممالک نے ستمبر میں تیل کی پیداوار بڑھا دی۔ اوپیک پلس کے سات ممالک نے ستمبر میں تیل کی پیداوار میں ایک لاکھ 88 ہزار بیرل یومیہ اضافہ کر دیا، جس کے بعد ان ممالک کا مجموعی پیداواری کوٹہ 3 کروڑ 10 لاکھ 10 ہزار بیرل یومیہ تک پہنچ گیا۔

روسی نیوز ایجنسی تاس نے بتایا کہ اوپیک کے اعداد و شمار کے مطابق اوپیک پلس کے سات ممالک (سعودی عرب، روس، عراق، کویت، قازقستان، الجزائر اور عمان) پر مشتمل گروپ نے تیل کی پیداوار میں رضاکارانہ طور پر کی گئی کمی کو مرحلہ وار ختم کرنے کے عمل کے تحت پیداوار میں اضافہ کیا ہے۔

اوپیک پلس نے اکتوبر 2025 سے تیل کی پیداوار میں 16 لاکھ 50 ہزار بیرل یومیہ کی اضافی رضاکارانہ کمی کو مرحلہ وار ختم کرنا شروع کیا تھا۔ متحدہ عرب امارات کے یکم مئی 2026 کو اوپیک اور اوپیک پلس سے علیحدہ ہونے کے بعد اس کمی کا مؤثر حجم تقریباً 15 لاکھ بیرل یومیہ رہ گیا تھا۔ستمبر میں اوپیک پلس کے سات ممالک اس رضاکارانہ پیداواری کمی کو مکمل طور پر ختم کرتے ہوئے روکی گئی تیل کی مقدار دوبارہ عالمی منڈی میں واپس لے آئیں گے۔

اوپیک پلس ممالک نے سابقہ اضافی پیداوار کی تلافی کے لیے مقررہ مدت 2026 کے اختتام تک بڑھانے کا بھی فیصلہ کیا ہے، تاہم نظرثانی شدہ تلافی شیڈول تاحال جاری نہیں کیا گیا۔اوپیک پلس کے سات ممالک عالمی تیل مارکیٹ کی صورتحال کا جائزہ لینے کے لیے ماہانہ اجلاس جاری رکھیں گے، جبکہ آئندہ اجلاس 6 ستمبر کو ہوگا۔