بلوچستان انوائرمنٹل پروٹکشن ایجنسی کا بوتل بند پانی تیار کرنے والے یونٹس کا معائنہ، ماحولیاتی قوانین پر عملدرآمد کی ہدایت

کوئٹہ۔ 05 اگست (اے پی پی):بلوچستان انوائرنمنٹل پروٹیکشن ایجنسی (بی ای پی اے)کی انفورسمنٹ ٹیم نے ڈائریکٹر محمد علی کی ہدایت پر کوئٹہ میں منرل واٹر (بوتل بند پینے کا پانی) تیار کرنے والے یونٹس کا معائنہ کیا۔بی ای پی اے کی ٹیم، جس میں انسپکٹر شوکت کاکڑ، اسسٹنٹ انسپکٹر طارق احمد، صغیر احمد، فرہاد خان اور سمیر خان شامل تھے، نے ہنہ بوتل پلانٹ (سرپل) اور اقواہ ہا جہنک بوتل پلانٹ (ایئرپورٹ روڈ) کا دورہ کیا۔دورانِ معائنہ ٹیم نے فیکٹریوں میں صفائی، حفظانِ صحت کے انتظامات، فضلہ تلف کرنے کے طریقہ کار، گندے پانی کے اخراج اور مجموعی ماحولیاتی صورتحال کا جائزہ لیا تاکہ بلوچستان ماحولیاتی تحفظ ایکٹ 2012 اور متعلقہ ماحولیاتی قوانین پر عملدرآمد کو یقینی بنایا جا سکے۔

بی ای پی اے حکام نے فیکٹری انتظامیہ کو ہدایت کی کہ وہ صفائی اور حفظانِ صحت کے معیار کو بہتر بنائے، ٹھوس اور مائع فضلے کو ماحولیاتی قوانین کے مطابق مناسب طریقے سے ٹھکانے لگائے اور ماحول دوست طریقہ کار اپنائے۔حکام نے انتظامیہ کو ہدایت کی کہ وہ جلد از جلد بلوچستان ماحولیاتی تحفظ ایجنسی کے دفتر میں حاضر ہو کر ماحولیاتی این او سی کے حصول کے لیے درخواست جمع کروائے۔بی ای پی اے ٹیم نے خبردار کیا کہ مطلوبہ ماحولیاتی این او سی کے بغیر یونٹ چلانے کی صورت میں قانون کے مطابق کارروائی عمل میں لائی جا سکتی ہے۔