تنازعات میں گھِرے علاقوں میں2024 کے دوران بچوں کے خلاف تشدد کی مثال نہیں ملتی، اقوام متحدہ کی رپورٹ

اقوام متحدہ ۔20جون (اے پی پی):اقوام متحدہ کی سالانہ رپورٹ میں کہا گیا ہے کہ2024میں غزہ سےکانگو تک تنازعات میں گھِرے علاقوں میں بچوں کے خلاف تشدد کی مثال نہیں ملتی۔ اقوام متحدہ کے سیکرٹری جنرل انتونیو گوتریس کی رپورٹ کے مطابق 2024 میں کشیدہ حالات کے دوران بچوں کے خلاف تشدد غیر معمولی سطح پر پہنچ گیا۔2023 کے مقابلے میں سنگین خلاف ورزیوں کی تعداد میں حیرت انگیز طور پر 25 فیصد اضافہ ہوا۔

رپورٹ میں 2024 میں بچوں کے خلاف 41 ہزار 370 سنگین خلاف ورزیوں کی تصدیق کی گئی ہے،ان میں سے 36 ہزار 221 خلاف ورزیاں 2024 میں جبکہ پانچ ہزار 149 اس سے قبل کے عرصہ میں رپورٹ ہوئی تھیں تاہم ان کی تصدیق2024 میں کی گئی۔30 سال قبل مانیٹرنگ ٹول کے قیام کے بعد سے یہ اب تک کی سب سے زیادہ تعداد ہے۔

رپورٹ میں کہا گیا ہے کہ چار ہزار 500 سے زائد بچے ہلاک جبکہ 7 ہزار زخمی ہو چکے ہیں، تنازعات میں بچوں کو اندھا دھند حملوں کا سامنا کرنا پڑتا ہے۔متعدد خلاف ورزیوں کا شکار ہونے والے بچوں کی تعداد میں بھی 22 ہزار 495 کا واضح اضافہ ہوا ہے۔اقوام متحدہ کے سیکرٹری جنرل کی خصوصی نمائندہ ورجینیا گامبا نے کہا کہ 22 ہزار 495 بچے جنہیں پڑھنا لکھنا سیکھنا یا کھیلنا چاہیے تھا وہ بندوق اور بم دھماکوں سے بچنے کے طریقے سیکھنے پر مجبور ہیں۔انہوں نے کہا کہ یہ ایک جاگ اٹھنے کی صدا (ویک اپ کال)ہونی چاہیے۔

اپنی سالانہ رپورٹ میں اقوام متحدہ نے تنازعات میں گھرے دنیا بھر کے تقریباً 20 علاقوں میں بچوں کے حقوق کی خلاف ورزیوں کو مرتب کیا ہے جن کی عمریں 18 سال سے کم ہیں۔رپورٹ میں آ لسٹ آف شیم کے عنوان سے ضمیمے میں ان خلاف ورزیوں کے ذمہ داروں کی توجہ اس طرف مبذول کرائی گئی ہے۔اسرائیلی مسلح فوج جس کا نام گزشتہ سال فلسطینی عسکریت پسند گروپ حماس کے ساتھ رکھا گیا تھا، اس فہرست میں برقرار ہے۔