جنوبی کوریا کی آبنائے ہرمز میں فوجی دستے بھیجنے کی تیاری

سیئول ۔4ستمبر (اے پی پی):جنوبی کوریا کی حکومت آبنائے ہرمز میں فوجی دستے بھیجنے کی تیاری کر رہی ہے۔

بی بی سی کے مطابق اس حوالہ سے پارلیمنٹ سے منظوری لینے کے اقدامات جاری ہیں جس کے بعد رواں سال کے آخر تک اس منصوبے پر عملد رآمد شروع ہو جائے گا۔ جنوبی کوریا کی حکومت آبنائے ہرمز میں جہاز رانی کی آزادی کے تحفظ کے لیے فوجی سازوسامان اور اہلکار تعینات کرنے کی تیاری کر رہی ہے اور اس مشن کو رواں سال کے اختتام سے پہلے شروع کرنے کا ارادہ رکھتی ہے۔ فی الوقت جنوبی کوریا کی حکومت اس تعیناتی کے لیے پارلیمانی منظوری حاصل کرنے کی خاطر ضروری قانونی مراحل طے کررہی ہے۔ جنوبی کوریا کی حکومت کابینہ میں اس منصوبے کا جائزہ لینے کے بعد رواں ماہ پارلیمان سے منظوری حاصل کرنے کے لیے باضابطہ درخواست پیش کرنے کا ارادہ رکھتی ہے۔

جنوبی کوریا کی طرف سے ممکنہ فوجی تعیناتی ایسے وقت میں زیرِ غور ہے جب آبنائے ہرمز میں سلامتی کی صورتحال کشیدہ ہے اور حالیہ ہفتوں کے دوران تجارتی جہازوں پر حملوں میں اضافہ ہوا ہے۔ اسی وجہ سے متعدد ممالک اس اہم آبی گذرگاہ میں بحری سلامتی کے تحفظ کے لیے اپنے کردار کے امکانات کا جائزہ لے رہے ہیں۔بی بی سی نے یہ رپورٹ جنوبی کوریا کے ذرائع ابلاغ کی اطلاعات کی بنیاد پر تیار کی ہے جبکہ جنوبی کوریا کی حکومت کے عہدیداروں نے اب تک ان رپورٹس پر کوئی باضابطہ ردِعمل ظاہر نہیں کیا ہے۔