سابق فرانس، لیورپول اور پی ایس جی کے ڈیفینڈر مامادو ساکھو کا 35 سال کی عمر میں ریٹائرمنٹ کا اعلان

پیرس۔13جنوری (اے پی پی):سابق فرانس، لیورپول اور پیرس سینٹ جرمین کے سینٹر بیک فٹ بالر مامادو ساکھو نے اپنے فٹبال کیریئر کے اختتام کا اعلان کر دیا۔ ای ایس پی این کے مطابق 35 سالہ ڈیفینڈر مامادو ساکھو گزشتہ جنوری سے کسی کلب سے منسلک نہیں تھے، جب انہوں نے جارجیائی کلب ٹورپیڈو کٹائیسی چھوڑا تھا۔ڈیفینڈر مامادو ساکھو نے پی ایس جی کی اکیڈمی سے تربیت حاصل کی اور بعد میں پیرس سینٹ جرمین کی ٹیم کی قیادت بھی کی۔ وہ اس ٹیم کا حصہ تھے جس نے 2012-13 کے لیگ 1 کا ٹائٹل جیتا۔

اپنے ریٹائرمنٹ کے اعلان سے قبل انہوں نے پی ایس جی اور پاریس ایف سی کے درمیان فرانس کپ کے راؤنڈ آف 32 کے میچ کے موقع پر کہاکہ میں سب کا شکریہ ادا کرنا چاہتا ہوں اور باضابطہ طور پر اپنے کیریئر کے اختتام کا اعلان کرنا چاہتا ہوں۔2013 میں ڈیفینڈر مامادو ساکھو لیورپول منتقل ہوئے اور چار سیزن وہاں گزارے، اس کے بعد انہوں نے کرسٹل پیلس، مونٹپیلیر اور آخر میں ٹورپیڈو کٹائیسی کے لیے کھیلتے ہوئے اپنی پیشہ ورانہ زندگی مکمل کی۔

مامادو ساکھو فرانس کی قومی ٹیم کے لیے 29 میچز کھیل چکے ہیں اور 2014 کے عالمی کپ میں بھی ٹیم کا حصہ تھے، جہاں انہوں نے گروپ کے تین میچ اور کوارٹر فائنل میں جرمنی کے خلاف 0-1 کی شکست میں حصہ لیا۔مامادو ساکھو کی مضبوط دفاعی صلاحیت اور قیادت کی خصوصیات انہیں اپنے دور کے بہترین سینٹر بیکس میں شمار کرواتی ہیں، اور ان کے کیریئر کا اختتام یورپی اور عالمی فٹبال میں ایک یادگار سفر کے طور پر یاد رکھا جائے گا۔