سردار ایاز صادق کی قیادت میں پارلیمانی وفد 19 تا 21 جنوری کو چین کا تین روزہ سرکاری دورہ کرے گا

اسلام آباد۔18جنوری (اے پی پی):سپیکر قومی اسمبلی سردار ایاز صادق کی قیادت میں پارلیمانی وفد 19 تا 21 جنوری 2026 کو چین کا تین روزہ سرکاری دورہ کرے گا ۔ یہ دورہ چین کی نیشنل پیپلز کانگریس (NPC) کی اسٹینڈنگ کمیٹی کے چیئرمین ژاؤ لیجی کی خصوصی دعوت پر کیا جا رہا ہے۔اتوار کو قومی اسمبلی سیکرٹریٹ سے جاری بیان کے مطابق سپیکر قومی اسمبلی کا پارلیمانی وفد کے ہمراہ دورہ سال 2026 میں پاکستانی پارلیمنٹ کا عوامی جمہوریہ چین کا پہلا سرکاری سطح کا دورہ ہے۔

یہ دورہ پاکستان اور چین کے مابین سفارتی تعلقات کے قیام کی 75ویں سالگرہ کے موقع پر ہو رہا ہے، جو دونوں ممالک کے درمیان دیرینہ، مضبوط اور سدا بہار دوستی کا مظہر ہے۔اس تاریخی موقع پر پاکستان اور چین نے سال بھر مشترکہ تقریبات کے انعقاد کے ذریعے اس اہم سنگِ میل کو شایانِ شان انداز میں منانے پر اتفاق کیا ہے۔

سپیکر قومی اسمبلی سردار ایاز صادق کی قیادت میں پارلیمانی وفد چینی پارلیمانی اور سیاسی قیادت سے ملاقاتیں کرے گا، جن میں پارلیمانی تعاون کے فروغ اور دوطرفہ تعلقات کو مزید مستحکم بنانے پر تبادلہ خیال کیا جائے گا۔

پارلیمانی وفد میں وزیرِاعظم کی کوآرڈینیٹر برائے ماحولیاتی تبدیلی و ماحولیاتی ہم آہنگی اور کنوینر پاک-چین فرینڈ شپ گروپ رومینہ خورشید عالم، رکن قومی اسمبلی محمد نعمان، پارلیمانی سیکرٹری محترمہ زیب جعفر اور رکن قومی اسمبلی مولانا عبدالغفور حیدری شامل ہیں۔