سعودی عرب، حجاج کی خدمت کےلیےمزدلفہ اورجمرات میں 30 ہیلتھ یونٹ فعال

ریاض۔25مئی (اے پی پی):سعودی عرب کی وزارت صحت نے 1447ھ کے حج سیزن کے دوران صحت کی کوریج کو بڑھانے اور ضیوف الرحمن کے لیے طبی خدمات تک تیز رفتار رسائی کو ممکن بنانے کے لئے 30 فیلڈ ہیلتھ یونٹس کو فعال کر دیا ہے، جن میں سے 26 ہیلتھ یونٹس مشعر مزدلفہ اور 4 یونٹس جمرات اور حرم کے پورے راستے پر تقسیم کیے گئے ہیں۔ العربیہ اردو کے مطابق وزارت صحت نےکہا ہے کہ یہ کوششیں ہیلتھ سسٹم کے ان منصوبوں کا حصہ ہیں جن کا مقصد حجاج کرام کو جامع صحت کی دیکھ بھال فراہم کرنا ہے۔ یہ اقدامات ہیلتھ سیکٹر ٹرانسفارمیشن پروگرام اور ضیوف الرحمن سروس پروگرام کے اہداف کے عین مطابق ہیں جو مملکت کے وژن 2030 کے تحت ہیں ۔

ان کا مقصدحجاج کرام کو صحت اور اطمینان کے ساتھ اپنے مناسک ادا کرنے کے قابل بنانا ہے۔ یہ ہیلتھ یونٹس حجاج کرام کو مختلف قسم کی علاج کی خدمات فراہم کرتے ہیں، جن میں ہیٹ سٹروک، گرمی اور جسمانی تھکن کے معاملات سے نمٹنا، اس کے علاوہ جلد کے زخموں، رگڑ، دمہ کے دوروں اور بے ہوشی کا علاج شامل ہے۔ ان خدمات میں رینگنے والے جانوروں کے کاٹنے اور ڈسنے کے واقعات سے فوری نمٹنا بھی شامل ہے، جس سے سیزن کے دوران فیلڈ میں صحت کی صورتحال پر ردعمل کی کارکردگی کو تقویت ملتی ہے۔ ہیلتھ سسٹم نے 3000 سے زیادہ مختلف ایمبولینس گاڑیوں اور مشینوں کو کام پر لگایا ہے، اس کے ساتھ ساتھ فضائی ایمبولینس کے 11 طیارے بھی شامل کیے گئے ہیں، جو نازک کیسز پر تیز رفتار ردعمل کی مدد کے لیے ایک مربوط نظام کا حصہ ہے۔

ہیلتھ سسٹم نے ایمبولینس کی فوری روانگی کے لیے 526 پوائنٹس کو فعال کر کے اپنے آپریشنل منصوبوں کو مزید مضبوط کیا ہے، جنہیں 7700 سے زیادہ فیلڈ ایمبولینس عملے کی مدد حاصل ہے اور یہ عملہ مشاعر مقدسہ کے مختلف مقامات پر تعینات ہے۔ وزارت صحت نے چوبیس گھنٹے اپنی فیلڈ کوششیں جاری رکھنے کے عزم کا اعادہ کیا ہے تاکہ ضیوف الرحمن کو اعلیٰ معیار کی صحت کی خدمات کی فراہمی کو یقینی بنایا جا سکے اور مناسک حج کی ادائیگی کے دوران ان کی سکیورٹی اور سلامتی کو بہتر بنایا جا سکے۔