سمیڈا اور وزیراعظم یوتھ پروگرام کے درمیان نوجوانوں اور ایم ایس ایم ایز کے لیے مالی و کاروباری معاونت بڑھانے کے لیے مفاہمتی یادداشت پر دستخط

اسلام آباد۔10ستمبر (اے پی پی):سمال اینڈ میڈیم انٹرپرائزز ڈویلپمنٹ اتھارٹی (سمیڈا) اور وزیراعظم یوتھ پروگرام کے درمیان مفاہمتی یادداشت پر دستخط کیے گئے، جس کا مقصد پاکستان بھر میں مائیکرو، سمال اینڈ میڈیم انٹرپرائزز اور کاروبار شروع کرنے کے خواہشمند نوجوانوں کے لیے مالی اور کاروباری ترقی کی معاونت، آگاہی اور رسائی کو بہتر بنانے کے لیے باقاعدہ تعاون کا فریم ورک قائم کرنا ہے۔

وزیراعظم کے مشیر برائے صنعت و پیداوار ہارون اختر خان اور چیئرمین وزیراعظم یوتھ پروگرام رانا مشہود خان نے مفاہمتی یادداشت پر دستخط کی تقریب میں شرکت کی۔تقریب میں سی ای او سمیڈا نادیہ جے سیٹھ، جوائنٹ سیکریٹری صنعت و پیداوار مسٹر فریدون اکرم شیخ، وزیراعظم یوتھ پروگرام کی ٹیم اور مختلف شعبوں سے تعلق رکھنے والے دیگر نمائندگان بھی موجود تھے۔اس شراکت داری کے تحت سمیڈا اور وزیراعظم یوتھ پروگرام کے وسائل، مہارت، رسائی کے نیٹ ورکس اور ڈیجیٹل صلاحیتوں کو بروئے کار لاتے ہوئے وزیراعظم یوتھ بزنس اینڈ ایگریکلچر لون اسکیم تک جامع اور مساوی رسائی کو یقینی بنایا جائے گا۔ تعاون کا خصوصی محور اسٹارٹ اپس، پہلے سے قائم ایم ایس ایم ایز، انفرادی کاروباری افراد، فرمز اور کمپنیوں کے ساتھ ساتھ کم سہولیات والے علاقوں اور محروم طبقات، بالخصوص خواتین کاروباری افراد پر ہوگا۔

تقریب سے خطاب کرتے ہوئے وزیراعظم کے مشیر ہارون اختر خان نے کہا کہ یہ اقدام وزیراعظم کی ہدایت، قیادت اور وژن کے مطابق پاکستان کے نوجوانوں کے لیے معاشی مواقع میں اضافے اور ملک کے ایس ایم ای سیکٹر کو مضبوط بنانے کی جانب ایک اہم قدم ہے۔انہوں نے کہا کہ وزیراعظم کی قیادت اور وژن کے تحت ہم اس امر کو یقینی بنانے کے لیے کام کر رہے ہیں کہ نوجوانوں اور کاروباری افراد کو مالی مواقع، کاروباری ترقی کے لیے معاونت اور پائیدار کاروبار قائم کرنے اور انہیں وسعت دینے کے لیے درکار علم تک بہتر رسائی حاصل ہو۔ ہارون اختر خان نے کہا کہ سمیڈا اور وزیراعظم یوتھ پروگرام کے درمیان تعاون سے مالی مواقع اور ممکنہ مستفید ہونے والوں کے درمیان موجود خلا کو کم کرنے میں مدد ملے گی، جبکہ آگاہی، مالی خواندگی اور کاروباری ترقی کے وسائل تک رسائی میں بھی بہتری آئے گی۔

انہوں نے کہا کہ حکومت کی خصوصی توجہ کم سہولیات والے علاقوں میں کاروباری افراد تک رسائی بڑھانے اور اس بات کو یقینی بنانے پر ہے کہ خواتین کاروباری افراد بھی دستیاب مالی اور کاروباری معاونت سے بھرپور استفادہ کرسکیں۔مفاہمتی یادداشت کے تحت سمیڈا وزیراعظم یوتھ بزنس اینڈ ایگریکلچر لون اسکیم کے حوالے سے آگاہی مہمات اور تربیتی پروگرامز منعقد کرے گا، جن میں اہلیت کے معیار، درکار دستاویزات اور درخواست جمع کرانے کے طریقہ کار سے متعلق معلومات فراہم کی جائیں گی۔ سمیڈا شراکت دار بینکوں اور متعلقہ اسٹیک ہولڈرز کے تعاون سے مالی خواندگی کے اقدامات اور رسمی مالیاتی ذرائع سے متعلق آگاہی کو بھی فروغ دے گا۔

سمیڈا کم سہولیات والے علاقوں اور محروم طبقات، بالخصوص خواتین کاروباری افراد تک خصوصی رسائی کے اقدامات کرے گا تاکہ مالیاتی خدمات تک مساوی رسائی کو فروغ دیا جاسکے۔ اس کے علاوہ، درخواست گزاروں کو قابلِ عمل مالیاتی تجاویز تیار کرنے میں معاونت فراہم کرنے کے لیے پری فیزیبلٹی اسٹڈیز، مالیاتی ویب بیسڈ ٹولز، بزنس پلان ٹیمپلیٹس، تربیتی ماڈیولز اور دیگر متعلقہ رہنمائی سمیت کاروباری ترقی کے وسائل تک رسائی فراہم کی جائے گی۔وزیراعظم یوتھ بزنس اینڈ ایگریکلچر لون اسکیم کو سمیڈا کے صوبائی اور علاقائی دفاتر، بشمول ہیلپ ڈیسک، کے ذریعے بھی فروغ دیا جائے گا۔شراکت داری کے تحت وزیراعظم یوتھ پروگرام اسکیم سے متعلق معلومات اور سمیڈا کی جانب سے تیار کردہ معاون مواد، بشمول اکثر پوچھے جانے والے سوالات ،ویڈیو ٹیوٹوریلز، بزنس پلان ٹیمپلیٹس اور رہنما مواد، اپنے سوشل میڈیا پلیٹ فارمز اور ڈیجیٹل یوتھ ہب کے ذریعے نوجوانوں تک پہنچائے گا۔وزیراعظم یوتھ پروگرام ڈیجیٹل یوتھ ہب پر سمیڈا کے اہم کاروباری ترقی کے وسائل بھی نمایاں کرے گا، جن میں پری فیزیبلٹی اسٹڈیز، مالیاتی ٹولز، ایس ایم ای فنانسنگ پروڈکٹس ڈیٹا بیس، تربیتی ماڈیولز اور دیگر متعلقہ وسائل شامل ہیں۔

دونوں ادارے مسترد ہونے والی قرض درخواستوں سے متعلق باہمی طور پر طے شدہ معلومات، بشمول درخواست مسترد ہونے کی وجوہات، بھی شیئر کریں گے تاکہ تجزیہ کیا جاسکے اور ان شعبوں کی نشاندہی کی جاسکے جہاں مزید معاونت درکار ہے۔دونوں ادارے وزیراعظم یوتھ بزنس اینڈ ایگریکلچر لون اسکیم کی نمایاں تشہیر اور معلومات کی فراہمی کے لیے اپنی اپنی ویب سائٹس پر مخصوص معلوماتی سیکشنز اور باہمی روابط بھی فراہم کریں گے۔ مفاہمتی یادداشت کے تحت باہمی رابطہ کاری کے لیے فوکل ٹیمیں تشکیل دی جائیں گی، جبکہ پیش رفت کا جائزہ لینے اور عملدرآمد سے متعلق مسائل کو حل کرنے کے لیے سہ ماہی جائزہ اجلاس منعقد کیے جائیں گے۔ مشترکہ سرگرمیاں اور ان سے متعلق مالی ذمہ داریاں باہمی رضامندی اور پیشگی تحریری دستاویزات کے ذریعے طے کی جائیں گی۔ہارون اختر خان نے کہا کہ مالی خواندگی اور کاروباری تجاویز کے معیار کو بہتر بنانا رسمی مالیاتی ذرائع تک بامعنی رسائی کو وسعت دینے کے لیے انتہائی اہم ہے۔

انہوں نے کہا کہ یہ تعاون نہ صرف مالی مواقع کے بارے میں آگاہی میں اضافہ کرے گا بلکہ نوجوان کاروباری افراد اور ایم ایس ایم ایز کو قابلِ عمل بزنس پلان تیار کرنے اور رسمی مالیاتی ذرائع تک رسائی حاصل کرنے کے طریقہ کار کو بہتر طور پر سمجھنے میں بھی مدد دے گا۔انہوں نے مزید کہا کہ یہ اقدام پاکستان بھر میں نوجوانوں کی کاروباری سرگرمیوں، ایم ایس ایم ایز کی ترقی اور مالی شمولیت کے فروغ میں معاون ثابت ہوگا۔یہ شراکت داری سمیڈا کے بزنس پلان کے تحت 92,480 ایم ایس ایم ایز کو مالی خواندگی فراہم کرنے کے ہدف کے حصول میں بھی معاونت کرے گی، جس کے ذریعے رسائی کو مضبوط، مالی خواندگی کو بہتر اور نوجوانوں و ایم ایس ایم ایز کو رسمی مالیاتی مواقع تک رسائی میں سہولت فراہم کی جائے گی۔مفاہمتی یادداشت سمیڈا اور وزیراعظم یوتھ پروگرام کی جانب سے ادارہ جاتی تعاون کو مضبوط بنانے اور نوجوان کاروباری افراد اور ایم ایس ایم ایز کو معلومات، مالی خواندگی اور کاروباری ترقی کی خدمات تک زیادہ بہتر رسائی فراہم کرنے کی مشترکہ کوشش ہے، جو ملک کے نوجوانوں کے لیے معاشی مواقع کو وسعت دینے کے وزیراعظم کے وژن سے ہم آہنگ ہے۔