لاہور میں محفوظ بسنت 12، 13، 14 مارچ کو ہو گی،سیکرٹری داخلہ

لاہور۔10ستمبر (اے پی پی):سیکرٹری داخلہ پنجاب ڈاکٹر احمد جاوید قاضی کی زیر صدارت لاہور میں محفوظ بسنت کے حفاظتی انتظامات کے حوالے سے اہم اجلاس منعقد ہوا۔اجلاس میں حکومتِ پنجاب کی ہدایات کے مطابق لاہور میں 12، 13، 14 مارچ 2027 کو محفوظ بسنت کے انعقاد کیلئے ضروری حفاظتی انتظامات کا جائزہ لیا گیا اور متعلقہ محکموں کو ہدایات جاری کی گئیں۔ واضح رہے کہ مقررہ تاریخوں سے قبل اور بعد ازاں پنجاب بھر میں پتنگ بازی پر سخت پابندی برقرار ہے اور خلاف ورزی پر قانونی کاروائی کی ہدایت کی گئی ہے۔سیکرٹری داخلہ پنجاب ڈاکٹر احمد جاوید قاضی نے اجلاس کے دوران گفتگو کرتے ہوئے کہا کہ محکمہ داخلہ نے انسانی جانوں کی حفاظت کیلئے ضروری حفاظتی ہدایات جاری کی ہیں اور بسنت سے قبل تمام حفاظتی انتظامات مکمل کیے جائیں گے۔ سیکرٹری داخلہ نے کہا کہ بسنت کے موقع پر شہر میں کسی غیر محفوظ اور ناپائیدار چھت پر پتنگ بازی کی اجازت نہیں ہو گی۔ بسنت پر چھتوں کی دیواریں اور گرِل کم از کم ساڑھے3 فٹ بلند اور مضبوط ہونا لازم ہے جبکہ پتنگ بازی کیلئے استعمال ہونے والی چھتوں کی پائیداری اور محفوظ ہونے کی ذمہ داری مالکان پر عائد ہو گی۔انہوں نے ہدایت کی کہ بسنت سے قبل اجازت یافتہ مقامات پر چھتوں،منڈیر اور سیڑھیوں کی مرمت کروائی جائے جبکہ عمارتوں کے مالکان31 دسمبر 2026 تک تمام حفاظتی انتظامات مکمل کریں۔سیکرٹری داخلہ نے ہدایت کی کہ ڈپٹی کمشنر لاہور پرانی عمارتوں اور گھروں کی چھتوں کا مکمل معائنہ کروائیں اور غیر تسلی بخش رپورٹ کی صورت میں کمزور عمارت اور غیر محفوظ چھت پر بسنت کے دوران بھی پتنگ بازی پر پابندی عائد کریں۔انہوں نے کہا کہ بجلی کی تاریں چھت کے قریب ہونے کی صورت میں عمارت کے مالک بسنت سے قبل انہیں محفوظ بنانے کے پابند ہوں گے۔سیکرٹری داخلہ نے ہدایت کی کہ سٹی ٹریفک پولیس لاہور بسنت سے قبل20 لاکھ سے زائد موٹر سائیکلوں پر سیفٹی راڈز مفت لگائے جبکہ لیسکو تمام انسٹالیشنز کو نیٹ کے ذریعے بروقت محفوظ بنائے۔ڈپٹی کمشنر لاہور مقررہ حد کے مطابق پتنگ و ڈور کی تیاری،ترسیل اور فروخت کیلئے رواں ماہ اجازت نامہ جاری کریں گے۔بسنت کے دوران پی ایچ اے شہر کے درختوں اور لیسکو کھمبوں و تاروں سے محفوظ انداز میں پتنگیں اتارنے اور تلف کرنے کا پابند ہو گا۔انہوں نے کہا کہ بسنت کے ایام میں عمارتوں کی لفٹس کیلئے سیفٹی سرٹیفکیٹ کا حصول لازم جبکہ چھت پر آتش گیر مواد رکھنے پر پابندی ہوگی۔تمام اجازت یافتہ مقامات پر ابتدائی طبی امداد کے سامان کی موجودگی لازم ہے۔پتنگ بازی کے موقع پر بچوں کی حفاظت والدین،سرپرست اور منتظمین کی اولین ذمہ داری ہے جبکہ چھت پر بچوں اور دیگر شرکا کیلئے تمام حفاظتی انتظامات یقینی بنانا مالکان اور منتظمین کی مشترکہ ذمہ داری ہوگی۔سیکرٹری داخلہ نے کہا کہ ضلعی انتظامیہ،پولیس اور متعلقہ محکموں کے مجاز افسران پتنگ بازی کیلئے استعمال ہونے والی چھتوں کا جائزہ لیں گے جبکہ ڈپٹی کمشنر ہدایات اور قانون کی خلاف ورزی پر کسی بھی عمارت کو سیل کرنے کا اختیار رکھتے ہیں۔بسنت کے موقع پر عمارت مالک اور منتظم کسی بھی حادثے، جانی نقصان، زخمی ہونے یا قانون کی خلاف ورزی کا ذمہ دار ہو گا۔منتظمین تمام ہدایات اور قوانین پر عملدرآمد کے پابند ہوں گے۔انہوں نے کہا کہ عوام الناس انسانی جان کو تفریح پر فوقیت دیں اور تمام قوانین اور ہدایات کی پاسداری کریں۔ سیکرٹری داخلہ پنجاب نے اجلاس میں واضح کیا کہ 12، 13، 14 مارچ 2027 سے قبل اور بعد ازاں پتنگ بازی پر مکمل پابندی برقرار ہے۔ بسنت کی مقررہ تاریخوں سے قبل اور بعد ازاں پتنگ بازی پر5 سال قید اور20 لاکھ روپے جرمانہ ہو گا جبکہ حکومتی اجازت سے قبل پتنگوں اور ڈور کی تیاری،ترسیل اور فروخت پر 7 سال قید اور50 لاکھ روپے جرمانہ ہو گا۔ انہوں نے کہا کہ اہل علاقہ اور عوام کیلئے پریشانی،ہراسگی یا غیر مہذب رویے پر سخت پابندی عائد ہے۔شہری کسی بھی غیر محفوظ، غیر قانونی اور غیر مہذب سرگرمی کی اطلاع ایمرجنسی15 پر دیں۔محفوظ بسنت کی تیاریوں کے حوالے سے منعقدہ اہم اجلاس میں سپیشل سیکرٹری داخلہ زینب خان، کمشنر لاہور، ڈپٹی کمشنر لاہور، ڈی آئی جی آپریشنز لاہور، سی ٹی او لاہور، ایڈیشنل سیکرٹری انٹرنل سکیورٹی، ایڈیشنل سیکرٹری جوڈیشل، ڈائریکٹر لا، ڈائریکٹر سول ڈیفنس پنجاب کے علاوہ لیسکو، پی ایچ اے، والڈ سٹی اتھارٹی اور ایل ڈی اے سے افسران نے شرکت کی۔