قومی جونیئر گرلز ہاکی ٹیم کی شرکت کے سلسلے میں تربیتی کیمپ 18 اگست سے شروع ہوگا

اسلام آباد۔17اگست (اے پی پی):پاکستان ہاکی فیڈریشن نے چین میں منعقد ہونے والے ’ویمنز جونیئر ایشیا کپ 2026‘ میں قومی جونیئر گرلز ہاکی ٹیم کی شرکت کے سلسلے میں تربیتی کیمپ 18 اگست سے شروع ہوگا۔مذکورہ تربیتی کیمپ کے لیے اسلام آباد میں حال ہی میں اختتام پذیر ہونے والی ’قومی گرلز انڈر-18 ،انڈر-21 چیمپئن شپ‘ کی سرفہرست (ٹاپ 4) ٹیموں کی تمام کھلاڑیوں کو طلب کیا گیا ہے تاکہ تمام باصلاحیت کھلاڑیوں کو مکمل شفافیت اور میرٹ کی بنیاد پر قومی ٹیم میں جگہ بنانے کا مساوی موقع مل سکے۔ تمام منتخب کھلاڑیوں کو 18 اگست، شام 4:00 بجے فاطمہ جناح ویمنز ہاسٹل میں رپورٹ کرنے کی ہدایت کی گئی ہے۔

ایشین ہاکی فیڈریشن (اے ایچ ایف) کی ہدایات کے مطابق صرف وہی کھلاڑی جونیئر ویمنز ایونٹ میں شرکت کی اہل ہوں گی جن کی تاریخ پیدائش یکم جنوری 2006ء یا اس کے بعد کی ہے۔ عمر کی حد سے متعلق ایشین ہاکی فیڈریشن کی ایس او پیز پر سختی سے عمل درآمد کیا جائے گا۔ پاکستان ہاکی فیڈریشن نے کہاکہ اس بین الاقوامی ایونٹ میں شرکت سے پاکستان کی باصلاحیت اور نوجوان گرلز کھلاڑیوں کو ایشیائی سطح کے اعلیٰ ترین مقابلے میں اپنی صلاحیتوں کے لوہا منوانے اور قیمتی بین الاقوامی تجربہ حاصل کرنے کا بہترین موقع میسر آئے گا۔