مالی سال27- 2026 میں پن بجلی کی پیداواری صلاحیت میں 1,960 میگاواٹ اضافے کا منصوبہ

اسلام آباد۔23اگست (اے پی پی):حکومت نے رواں مالی سال 27-2026 کے بجلی پیدا کرنے والے منصوبوں کے کمیشننگ شیڈول کے تحت پن بجلی کی پیداواری صلاحیت میں 1,960 میگاواٹ اضافے کا منصوبہ بنایا ہے جس میں سب سے بڑا حصہ تربیلا پانچویں توسیعی منصوبے کے تین یونٹس کا ہوگا۔ویلتھ پاکستان کو دستیاب جولائی 2026 سے جون 2027 تک کمیشن کیے جانے والے بجلی منصوبوں کے شیڈول کے مطابق واٹر اینڈ پاور ڈویلپمنٹ اتھارٹی (واپڈا) کے زیر انتظام زیر تعمیر یا بحالی کے عمل سے گزرنے والے پانچ پن بجلی منصوبوں اور یونٹس کی مجموعی صلاحیت 1,960 میگاواٹ ہے جو شیڈول میں شامل مجموعی 3,787.24 میگاواٹ پیداواری صلاحیت کا تقریباً 51.8 فیصد بنتی ہے۔پن بجلی میں سب سے بڑا اضافہ خیبرپختونخوا میں تربیلا پانچویں توسیعی منصوبے کے 510 میگاواٹ صلاحیت کے حامل تین یونٹس سے ہوگا، پہلے یونٹ کو ستمبر 2026، دوسرے کو نومبر اور تیسرے کو دسمبر 2026 میں فعال کرنے کا ہدف مقرر کیا گیا ہے۔تربیلا کے یہ تینوں یونٹس مجموعی طور پر 1,530 میگاواٹ بجلی کی پیداواری صلاحیت میں اضافہ کریں گے جو شیڈول میں شامل پن بجلی کی مجموعی صلاحیت کا تقریباً 78 فیصد اور پورے پروگرام میں شامل مجموعی پیداواری صلاحیت کا 40 فیصد سے زائد بنتا ہے۔کمیشننگ شیڈول کے مطابق پن بجلی کی زیادہ تر نئی صلاحیت مالی سال 2026-27 کی پہلی ششماہی میں نظام میں شامل ہونے کی توقع ہے کیونکہ تربیلا کے تینوں یونٹس کو دسمبر 2026 تک فعال کرنے کا ہدف ہے۔پن بجلی کا ایک اور بڑا اضافہ خیبرپختونخوا میں داسو ہائیڈرو پاور پراجیکٹ کے پہلے 360 میگاواٹ یونٹ سے ہوگا۔ شیڈول کے مطابق واپڈا کے اس منصوبے کے پہلے یونٹ کو مئی 2027 میں فعال کرنے کا ہدف مقرر کیا گیا ہے۔داسو کا یہ یونٹ شیڈول میں شامل 1,960 میگاواٹ پن بجلی کی صلاحیت کا تقریباً 18.4 فیصد بنتا ہے۔باقی 70 میگاواٹ صلاحیت آزاد جموں و کشمیر میں منگلا کے یونٹس 9 اور 10 کی بحالی سے حاصل ہوگی جسے جون 2027 میں مکمل کرنے کا ہدف مقرر کیا گیا ہے۔پن بجلی کے علاوہ شیڈول میں شمسی توانائی کی مارکیٹ سے 301.9 میگاواٹ اور ہوا سے بجلی پیدا کرنے والے منصوبوں سے 49.2 میگاواٹ صلاحیت بھی شامل ہے جن کے تجارتی بنیاد پر فعال ہونے کی تاریخ جولائی 2026 مقرر کی گئی ہے۔شیڈول میں بجلی کی تقسیم کار کمپنیوں کے تحت نیٹ میٹرنگ کے ذریعے شمسی توانائی کی 1,476.14 میگاواٹ صلاحیت بھی شامل کی گئی ہے۔شیڈول کے مطابق پن بجلی پیداواری صلاحیت میں اضافے کا سب سے بڑا ذریعہ ہے جبکہ صرف تربیلا کے تین یونٹس ہی مجوزہ پن بجلی صلاحیت کا بڑا حصہ فراہم کریں گے۔تربیلا اور داسو منصوبے مجموعی طور پر 1,890 میگاواٹ صلاحیت کا اضافہ کریں گے جبکہ منگلا کے دو یونٹس کی بحالی سے مزید 70 میگاواٹ صلاحیت دستیاب ہوگی۔اگر منصوبے مقررہ کمیشننگ شیڈول کے مطابق آگے بڑھتے ہیں تو جون 2027 تک پن بجلی کی 1,960 میگاواٹ پیداواری صلاحیت فعال ہو جائے گی۔