مصر کا مغربی صحرا میں نئے گیس ذخیرے کی دریافت کا اعلان

قاہرہ ۔18نومبر (اے پی پی):مصر نے مغربی صحرا میں نئے گیس ذخیرے کی دریافت کا اعلان کر دیا۔شنہوا کے مطابق مصر کی وزارتِ پیٹرولیم نے پیر کے روز مغربی صحرا میں قدرتی گیس کے ایک نئے ذخیرے کی دریافت کا اعلان کیا ہے۔ ابتدائی ٹیسٹوں کے مطابق اس کنویں سے یومیہ تقریباً 3 کروڑ 60 لاکھ معیاری مکعب فٹ گیس حاصل ہونے کی توقع ہے۔وزارت کے مطابق یہ دریافت خلدہ پیٹرولیم کمپنی نے کی ہے، جو ملک کے توانائی شعبے کی اہم کمپنیوں میں شمار ہوتی ہے۔

بیان میں کہا گیا کہ ‘جمانہ-1’ نامی یہ تحقیقی کنواں برقی لاگز میں گیس سے بھرپور زونز کی نشاندہی کے بعد کھودا گیا تھا۔مزید بتایا گیا کہ کنویں کی صلاحیت کا مکمل جائزہ اور ٹیسٹنگ جاری ہے، جبکہ خلدہ پیٹرولیم آئندہ دو دن کے اندر اسے پیداوار کے مرحلے میں داخل کرنے پر کام کر رہی ہے۔یہ دریافت خلدہ پیٹرولیم اور اس کی بین الاقوامی شراکت دار کمپنی اپاچی کارپوریشن کی جانب سے حالیہ مہینوں میں سامنے آنے والی متعدد دریافتوں کا سلسلہ ہے، جو مغربی صحرا میں تیل و گیس کے ذخائر کی توسیع کے لیے سرگرم ہیں۔

وزارتِ پیٹرولیم کا کہنا ہے کہ نئی دریافت ملکی پیداوار میں اضافہ کرے گی اور مصر کو خطے میں توانائی کے مرکز کے طور پر مستحکم کرنے کی حکمتِ عملی کو تقویت دے گی۔قابلِ ذکر ہے کہ مصر حالیہ برسوں میں قدرتی گیس کی پیداوار میں کمی کے باعث نئے ذخائر کی تلاش میں دلچسپی بڑھا رہا ہے۔ اگست میں وزیرِ اعظم مصطفیٰ مدبولی نے بتایا تھا کہ ملک کی موجودہ یومیہ گیس پیداوار 4.1 بلین مکعب فٹ ہے، جسے 2027 تک 6.6 بلین مکعب فٹ تک بڑھانے کا ہدف مقرر کیا گیا ہے۔