معرکۂ حق میں پاک افواج نے بھارتی جارحیت کا منہ توڑ جواب دے کر دشمن کے غرور کو خاک میں ملا دیا، انجینئر امیر مقام

اسلام آباد۔8مئی (اے پی پی):وفاقی وزیر امور کشمیر وگلگت بلتستان انجینئر امیر مقام نے کہا ہے کہ افواجِ پاکستان کی بہادری، پیشہ ورانہ مہارت اور قربانیوں کو خراجِ تحسین پیش کرتے ہیں، معرکۂ حق میں پاک افواج نے بھارتی جارحیت کا منہ توڑ جواب دے کر دشمن کے غرور کو خاک میں ملا دیا۔معرکہ حق کا ایک سال مکمل ہونے پر اپنے پیغام میں انجینئر امیر مقام نے کہا کہ پاک فضائیہ نے جدید جنگی حکمتِ عملی کے ذریعے تاریخی فضائی معرکے میں دشمن کے طیارے اور دفاعی نظام تباہ کیے، معرکۂ حق پاکستان کی قومی اور دفاعی تاریخ کا ایک درخشاں اور یادگار باب ہے۔

انجینئر امیر مقام نے کہا کہ وزیراعظم شہباز شریف اور فیلڈ مارشل سید عاصم منیر کی قیادت میں پوری قوم افواجِ پاکستان کے شانہ بشانہ کھڑی رہی۔انجینئر امیر مقام نے کہا کہ بھارتی جارحیت کے خلاف سیاسی و قومی قیادت نے مثالی اتحاد اور یکجہتی کا مظاہرہ کیا،معرکۂ حق نے عالمی سطح پر پاکستان کی عسکری اور سفارتی صلاحیتوں کا لوہا منوایا۔

انجینئر امیر مقام نے کہا کہ شہداء کی عظیم قربانیاں قوم کے لیے باعثِ فخر ہیں، جنہیں ہمیشہ یاد رکھا جائے گا،حکومت شہداء کے خاندانوں کی عزت، فلاح و بہبود اور ہر ممکن معاونت کے لیے پرعزم ہے۔وفاقی وزیر امور کشمیر نے دعا کی کہ اللہ تعالیٰ شہداء کے درجات بلند فرمائے اور پاکستان کو امن، استحکام اور ترقی عطا کرے۔