اسلام آباد۔28ستمبر (اے پی پی):وزیر مملکت برائے امور خارجہ حنا ربانی کھر نے واشنگٹن میں امریکی کانگریس کی خاتون رکن الہان عمر سے ملاقات کی۔ بدھ کو دفتر خارجہ کے مطابق وزیر مملکت نے امریکی کانگریس کی رکن سے گفتگو کرتے ہوئے کہا کہ امریکی کانگریس کمزور ممالک کو موسمیاتی بحران سے نمٹنے میں مدد دینے میں اہم کردار ادا کرسکتی ہے۔ حنا ربانی کھر نے انہیں پاکستان میں سیلاب سے بڑے پیمانے پر ہونے والی وسیع تباہی سے آگاہ کیا۔
انہوں نے امریکی حکومت کی طرف سے بروقت امداد کی فراہمی کو سراہتے ہوئے کہا کہ پاکستان کو سیلاب سے متاثرہ علاقوں میں بہتر انداز میں تعمیر نو کے لیے امریکہ اور بین الاقوامی برادری سے اضافی مدد درکار ہوگی۔ انہوں نے کہا کہ گرین ہاوس گیسوں کے سب سے کم اخراج کرنے والے ممالک میں سے ایک ہونے کے باوجود پاکستان کو موسمیاتی تبدیلیوں سے سخت نقصان اٹھانا پڑ رہا ہے۔
انہوں نے اس بات پر زور دیا کہ عالمی برادری کو موسمیاتی بحران کے بوجھ کو مساوی طور پر بانٹنا چاہیے کیونکہ یہ ایک عالمی چیلنج ہے جس کے لئے عالمی ردعمل اور اجتماعی کارروائی کی ضرورت ہے۔ امریکی کانگریس کی رکن الہان عمر نے شدید سیلاب سے ہونے والے جانی نقصان اور تباہی پر اظہار ہمدردی کیا۔
انہوں نے تباہ کن سیلاب سے نمٹنے کے لئے پاکستان کو مزید امداد کی فراہمی کےلئے اپنے تعاون کا یقین دلایا۔ دونوں رہنمائوں نے زراعت اور موسمیاتی تبدیلی سمیت متنوع شعبوں میں مستقل شمولیت کی ضرورت پر بھی تبادلہ خیال کیا۔
