وفاقی وزیر و صدر مسلم لیگ (ن) خیبر پختونخوا انجینئر امیر مقام نے عید الاضحیٰ کی نماز اپنے آبائی علاقےشانگلہ میں ادا کی

شانگلہ۔ 27 مئی (اے پی پی):وفاقی وزیر برائے امورِ کشمیر، گلگت بلتستان و سیفران اور صدر مسلم لیگ (ن) خیبر پختونخوا انجینئر امیر مقام نے بدھ کے روز عید الاضحیٰ کی نماز اپنے آبائی علاقے چاگم، شانگلہ میں ادا کی۔اس بابرکت موقع پر ملک کی یکجہتی، خوشحالی اور سلامتی کے لیے خصوصی دعائیں کی گئیں۔ اجتماع میں مقبوضہ کشمیر اور فلسطین کے مظلوم عوام کو بھی یاد کیا گیا اور ان کی آزادی و فلاح کے لیے دعائیں مانگی گئیں۔نماز کے بعد وفاقی وزیر امیر مقام نے مقامی رہائشیوں، عمائدین اور سیاسی کارکنوں سے عید کی پرخلوص مبارکباد کا تبادلہ کیا۔

اس موقع پر انہوں نے قومی یکجہتی کی اہمیت پر زور دیا اور ملکی دفاع میں مسلح افواج کی قربانیوں کو خراجِ تحسین پیش کیا۔ انہوں نے کہا کہ ہمارے بہادر شہداء نے مادرِ وطن کی سلامتی اور خودمختاری کےلیے اپنی جانوں کا نذرانہ پیش کیا۔ ہم ان کے اہلِ خانہ کے ساتھ کھڑے ہیں اور اس مقدس دن پر ان کے دکھ میں برابر کے شریک ہیں۔ وفاقی وزیر نے کشمیری اور فلسطینی عوام کی جاری جدوجہد کو اجاگر کرتے ہوئے پاکستان کے غیر متزلزل مؤقف کو دہرایا۔ انہوں نے کہا کہ ہمیں اس بابرکت موقع پر اپنے مظلوم کشمیری اور فلسطینی بھائیوں اور بہنوں کو نہیں بھولنا چاہیے۔ جب تک وہ اپنے جائز حقوق حاصل نہیں کر لیتے، پاکستان ان کی اخلاقی اور سفارتی حمایت جاری رکھے گا۔