پاکستان اور بنگلہ دیش کی کرکٹ ٹیموں کے درمیان سیریز کا پہلا میچ (کل) سے راولپنڈی کرکٹ سٹیڈیم میں شروع ہو گا

راولپنڈی ۔20اگست (اے پی پی):پاکستان اور بنگلہ دیش کی کرکٹ ٹیموں کے درمیان دو ٹیسٹ میچوں میں مشتمل سیریز کا پہلا میچ (کل) بروز بدھ سے راولپنڈی کرکٹ اسٹیڈیم میں شروع ہو گا ۔پاکستان کی پلیئنگ الیون میں شان مسعود ( کپتان ) ، سعود شکیل ( نائب کپتان ) ، عبداللہ شفیق ، بابر اعظم ، خرم شہزاد ، محمد علی ، محمد رضوان ( وکٹ کیپر ) ،نسیم شاہ ، صائم ایوب ، سلمان علی آغا اور شاہین شاہ آفریدی شامل ہیں ، یہ شان مسعود کا بطور کپتان ہوم سر زمین پر پہلا ٹیسٹ میچ ہو گا، پاکستان اس وقت آئی سی سی ورلڈ ٹیسٹ چیمپئن شپ میں چھٹے نمبر پر ہے، پاکستان نے اب تک چیمپئن شپ میں دو سیریز کھیلی ہیں، سری لنکا کے خلاف اس نے 0-2 سے کامیابی حاصل کی جبکہ آسٹریلیا کے خلاف اسے 0-3 سے شکست کا سامنا کرنا پڑا تھا۔

پاکستانی ٹیم اس سیزن میں 9 ٹیسٹ میچ کھیلے گی جو 99-1998 کے بعد سے پاکستان کا یہ مصروف ترین ٹیسٹ سیزن ہے۔پاکستان 7 ٹیسٹ میچ ہوم گراؤنڈ پر کھیلے گا جن میں بنگلہ دیش کے خلاف 2 ، اکتوبر میں انگلینڈ کے خلاف 3 اور آئندہ سال جنوری میں ویسٹ انڈیز کے خلاف 2 ٹیسٹ شامل ہیں، قومی ٹیم 2 ٹیسٹ میچوں کی سیریز دسمبر ، جنوری میں جنوبی افریقہ کے خلاف اس کی سر زمین پر کھیلے گی ۔پاکستان کے ریڈ بال ہیڈ کوچ جیسن گلیسپی کی رواں سال تقرری کے بعد یہ پہلی بین الاقوامی اسائنمنٹ ہے۔پی سی بی نے شائقین کی سہولت کے لیے ٹکٹیں انتہائی معمولی قیمت پر رکھی ہیں اور PCB.tcs.com.pk پر آن لائن دستیاب ہیں۔